टीम लोकमन सोलापूर |
सोलापूर मंगळवेढा राष्ट्रीय महामार्गावर सोलापूर शहरापासून अवघ्या सहा किलोमीटर अंतरावरील देगाव गावाजवळ दोन दुचाकींचा भीषण अपघात होऊन एक युवक जागीच मरण पावला तर दुसरा युवक गंभीर जखमी असून त्याला उपचारासाठी सोलापूरच्या शासकीय रुग्णालयात हलवण्यात आले आहे.
हा भीषण अपघात आज सकाळी दहा ते साडेदहाच्या दरम्यान घडला. अभिषेक केगनाडे वय २१ वर्षे रा. देगाव असे अपघातात मयत झालेल्या युवकाचे नाव असून या अपघातात गंभीर जखमी झालेला सुदर्शन काळे हा सुद्धा देगाव येथीलच रहिवासी. अपघातात मृत्यू झालेल्या युवकाकडे टीव्हीएस गाडी होती. महामार्गाच्या मध्ये असलेल्या डिव्हायडरला जाऊन गाडी धडकली आणि रस्त्याच्या मध्ये असलेल्या सोलार लॅम्पला संबंधित युवकाचे डोके धडकले आणि जबर मार लागून तो जागीच ठार झाल्याची माहिती मिळत आहे.
तर दुसरा युवक अतिवेगाने असल्याने त्याची गाडी अपघातग्रस्त युवकाच्या गाडीला धडकून तो सुद्धा गाडीवरून उडून पडल्याने गंभीर जखमी झाला आहे. घटनेची माहिती मिळताच पोलिसांनी घटनास्थळी तात्काळ भेट देऊन पंचनामा केला. जखमी युवकाला उपचारासाठी सोलापूरच्या शासकीय रुग्णालयाकडे पाठवण्यात आल्याची माहिती स्थानिक नागरिकांकडून मिळाली. हा अपघात होताच शिवसेना उद्धव बाळासाहेब ठाकरे गटाचे जिल्हाप्रमुख गणेश वानकर यांनी अपघात स्थळी भेट दिली. या ठिकाणी देगाव मधील ग्रामस्थांची मोठी गर्दी झाली होती. त्या युवकाच्या मृत्यूबद्दल देगाव गावातून हळहळ व्यक्त होत आहे.
