टीम लोकमन मरवडे |
मुख्यमंत्री समृद्ध पंचायतराज अभियानात संपूर्ण सोलापूर जिल्ह्यात दबदबा निर्माण केलेल्या मंगळवेढा तालुक्यातील भालेवाडी येथे मंगळवेढा येथील श्री संत दामाजी महाविद्यालयाच्या राष्ट्रीय सेवा योजना श्रमसंस्कार शिबिरांतर्गत आज संत दामाजी मेडिकल फाउंडेशनच्या अध्यक्षा, मंगळवेढा मल्टीस्पेशालिटी हॉस्पिटलच्या चेअरमन व सुप्रसिद्ध स्त्रीरोग व प्रसूतीशास्त्र तज्ञ डॉ. पुष्पांजली शिंदे यांच्या व्याख्यानाचे आयोजन करण्यात आल्याची माहिती संयोजक तथा श्री संत दामाजी महाविद्यालयाचे अधिव्याख्याते प्रा. डॉ. सुधाकर राठोड यांनी दिली.
युवा सरपंच डॉ. श्रीकांत दवले यांच्या नेतृत्वात भालेवाडी गावाचा कायापालट होत असून अनेक विकासकामे गावात झाल्याने भालेवाडी गावची वाटचाल समृद्धीकडे सुरू आहे. मुख्यमंत्री समृद्ध पंचायतराज अभियानासाठी असलेले 5 कोटी रुपयांचे बक्षीस भालेवाडी गावाला मिळवायचेच या इराद्याने संपूर्ण गाव एकवटला आहे. दुर्लक्षित असलेले भालेवाडी गाव आता सोलापूर जिल्ह्याच्या नकाशावर ठळकपणे दिसू लागले आहे. गावाला अनेक वरिष्ठ अधिकाऱ्यांसह सिनेअभिनेते, अभिनेत्री आणि सेलिब्रिटी देखील भेट देत आहेत.
मंगळवेढा येथील संत दामाजी महाविद्यालयाचे राष्ट्रीय सेवा योजनेचे विशेष श्रमसंस्कार शिबिर भालेवाडी येथे सुरू असून या श्रमसंस्कार शिबिरांतर्गत आज शुक्रवार दिनांक 23 जानेवारी 2026 रोजी दुपारी 3 वाजता जिल्हा परिषद प्राथमिक शाळेच्या आवारात महिला व महाविद्यालयीन विद्यार्थिनींसाठी मंगळवेढा येथील सुप्रसिद्ध स्त्रीरोग व प्रसूतीशास्त्र तज्ञ डॉ. पुष्पांजली शिंदे यांचे महिला व बालकांचे आरोग्य आव्हाने आणि उपाय या विषयावर व्याख्यान होणार आहे. या कार्यक्रमाचे अध्यक्षस्थान अण्णा मारुती दवले स्वीकारणार आहेत.
या कार्यक्रमासाठी प्रमुख पाहुणे म्हणून रामदास खोमणे, शशांक गवळी, भाऊसाहेब तेली, जिल्हा परिषद प्राथमिक शाळा भालेवाडीचे मुख्याध्यापक तानाजी कळकुंबे, मथुरा कोळी, सुनीता पवार, उषा जामगुंड, पल्लवी कांबळे, रेखा गवळी, सीमा गवळी, नर्मदा शिवशरण, साधना काळुंखे, बलवान वाकडे, नम्रता काटकर, मनीषा गवळी, केशव गवळी, तुळशीराम घाडगे, मायप्पा येडे, केरप्पा गवळी, श्री संत दामाजी महाविद्यालयाच्या इंग्रजी विभागाचे विभागप्रमुख प्रा. डॉ. संजय शिवशरण, प्रा. सरिता भोसले आदी मान्यवर उपस्थित राहणार आहेत.
या कार्यक्रमाच्या यशस्वीतेसाठी विद्या विकास मंडळाचे अध्यक्ष राहुल शहा यांच्या मार्गदर्शनाखाली कार्यक्रमाधिकारी प्रा. डॉ. राजाराम पवार, प्रा. डॉ. जावेद तांबोळी, प्रा. डॉ. सुधाकर राठोड यांचेसह संत दामाजी महाविद्यालयातील प्राध्यापक, विभागप्रमुख, शिक्षकेतर कर्मचारी प्रयत्नशील आहेत.
