टीम लोकमन मंगळवेढा |
सरपंच संतोष देशमुख हत्या प्रकरणी रोज नवनवीन खुलासे होत आहेत. या प्रकरणासह खंडणीच्या गुन्ह्यात वाल्मिक कराड याचेसह 4 आरोपींना अटक केली आहे. वाल्मिक कराड हा राष्ट्रवादी अजित पवार गटाचे मंत्री धनंजय मुंडे यांचा निकटवर्तीय असल्यामुळेच बीडचे पालकमंत्रिपदाच्या शर्यतीतून धनंजय मुंडे यांचा पत्ता कट होणार आहे.
पण राष्ट्रवादीचे मंत्री धनंजय मुंडे यांना शेजारीच असलेल्या धाराशिव जिल्ह्याचे पालकमंत्रिपद दिले जाणार अशी चर्चा आहे. पण मराठा संघटनांनी धनंजय मुंडेंच्या पालकमंत्रिपदाला विरोध केला आहे.
धाराशिव जिल्ह्यासाठी धनंजय मुंडे यांना पालकमंत्रिपद देऊ नये यासाठी मराठा समाजातील कार्यकर्ते आक्रमक झाले आहेत. त्यांनी धनंजय मुंडे यांच्या पालकमंत्रिपदाला विरोध करत आपल्या मागणीचे निवेदन प्रशासनाला दिले आहे. ‘बीडचा बिहार झाला, धाराशिवचा बिहार नको’ असे म्हणत धनंजय मुंडे यांना धाराशिवचे पालकमंत्री पद देऊ नका. असे म्हणत मराठा समाजाच्या कार्यकर्त्यांनी जिल्हाधिकारी यांचेमार्फत मुख्यमंत्री देवेंद्र फडणवीस यांना निवेदन दिले आहे.
मस्साजोग येथील सरपंच संतोष देशमुख यांचे मारेकरी आणि त्यांना मदत करणाऱ्या आरोपींना फाशी द्यावी. अशी मागणी देखील या निवेदनात करण्यात आली आहे. बीड जिल्ह्यातील मंत्री धाराशिव जिल्ह्याचा पालकमंत्री होण्यासाठी हालचाली सुरु आहेत. त्यांना जिल्ह्याचे पालकमंत्री करु नये. बीडचा बिहार झाला असून धाराशिवचा बिहार करू नये. त्यासाठी आम्ही मुंडे यांच्या नावाला विरोध करत असल्याचं मराठा समाजातील कार्यकर्त्यांनी सांगितले आहे.
विशेष म्हणजे, बीड हे धाराशिवला लागूनच आहे. बीडमध्ये तणावपूर्ण परिस्थिती असल्यामुळे महायुती सरकारने धनंजय मुंडे यांना पालकमंत्रिपद देण्यास रेड सिग्नल दिला आहे. पण त्यांचे नाव धाराशिवसाठी चर्चेत आहे. शेजारीच असलेल्या जिल्ह्याचे पालकमंत्रिपद मिळत असल्यामुळे ही राजकीय सोय तर नाही ना. अशी चर्चाही रंगली आहे.
बीडचा पालकमंत्री कोण होणार?
बीडचे पालकमंत्रीपद उपमुख्यमंत्री अजित पवारांकडे सोपवण्यात आल्याची माहिती मिळत आहे. धनंजय मुंडे यांचा पत्ता कट करण्यात आला आहे. भाजप नेत्या आणि राज्याच्या मंत्री पंकजा मुंडे यांनादेखील पालकमंत्री पदापासून लांब ठेवण्यात आले आहे. संतोष देशमुख हत्या प्रकरण तसेच अंतर्गत रस्सीखेच म्हणून बीडच्या पालकमंत्रीपदी अजित पवार यांची नियुक्ती केली असल्याचे समोर येत आहे.
