सत्तासंघर्षाचा तिढा वाढला ! गृहखाते तर सोडाच पण एकनाथ शिंदे यांच्या शिवसेनेतील ‘या’ चार नेत्यांना मंत्रिमंडळात घेण्यास भाजपचा आक्षेप ; एकनाथ शिंदे काय भूमिका घेणार?

टीम लोकमन मंगळवेढा |

राज्यात नुकत्याच पार पडलेल्या महाराष्ट्र विधानसभा निवडणुकीत भारतीय जनता पार्टी, शिवसेना शिंदे गट आणि राष्ट्रवादी अजित पवार गट यांच्या महायुतीला अनपेक्षित असे मोठे यश मिळाले तर शिवसेना ठाकरे गट, राष्ट्रवादी शरद पवार गट आणि काँग्रेस यांच्या महाविकास आघाडीला अतिशय मोठा फटका बसला.

विधानसभेच्या निकालानंतर आता येणाऱ्या नव्या सरकारचा शपथविधी नेमका कधी पार पडणार याकडे संपूर्ण महाराष्ट्रसह देशाचे लक्ष लागले आहे. एकीकडे एकनाथ शिंदे यांनी माघार घेत मुख्यमंत्रिपदासाठी भाजपचा मार्ग मोकळा केला असला तरी एकनाथ शिंदे नाराज असल्याची मोठी चर्चा आहे. एकनाथ शिंदे यांनी केंद्रीय गृहमंत्री अमित शाह यांच्या सोबत झालेल्या बैठकीत राज्याच्या गृहखात्यासह 12 मंत्रिपदांची मागणी केली आहे. ही मागणी तर भाजपने मान्य केली नाहीच मात्र आता शिंदे गटाच्या त्या चार मंत्र्यांच्या समावेशाला भाजपने आक्षेप घेतल्याची माहिती मिळत आहे.

एकनाथ शिंदे यांच्या शिवसेनेतील आमदार व शिंदेंच्या शिवसेनेतील ज्येष्ठ नेते अब्दुल सत्तार, दीपक केसरकर, तानाजी सावंत, संजय राठोड या चार नेत्यांचा नवीन मंत्रीमंडळात समावेश करण्यास भाजपचा आक्षेप असल्याची माहिती मिळत आहे. या चारही मंत्र्यांनी केलेल्या कारभारावरून भाजपमध्ये नाराजी असल्याचे समजते. आता राज्याचे काळजीवाहू मुख्यमंत्री एकनाथ शिंदे याबाबत काय निर्णय घेणार? हे पाहणे औत्सुक्याचे ठरणार आहे.

भाजप आणि शिवसेना शिंदे गटात धुसफूस?

एकनाथ शिंदे यांनी त्यांच्याबरोबर आलेल्या आमदारांना अजूनपर्यंत तरी नाराज केलेले नाही. अब्दुल सत्तार, तानाजी सावंत, संजय राठोड यांना मंत्रिपद न देणे एकनाथ शिंदे यांच्यासाठी मोठी डोकेदुखी ठरु शकते. तानाजी सावंत यांचा कुठल्याही परिस्थितीत मंत्रीमंडळात समावेश झालाच पाहिजे अशी भूमिका एकनाथ शिंदे यांनी घेतली आहे.

दुसरीकडे भरत गोगावले यांना मंत्रिपदाचे वेध लागले असून त्यांना मंत्रिपद द्यावे लागले तर दीपक केसरकर यांना थांबावे लागण्याची शक्यता वर्तवली जात आहे. कारण उदय सामंत आणि दीपक केसरकर हे कोकणातील दोघे मंत्री असताना गोगावले यांचा मंत्रिमंडळात समावेश केल्यास ही संख्या तीन होणार आहे. त्यामुळे आता या चार नेत्यांच्या मंत्रिमंडळातील समावेशावरुनही भाजप आणि शिंदे गटात धुसफूस होऊ शकते. आता एकनाथ शिंदे यांच्या निर्णयावरच या नेत्यांचे भवितव्य अवलंबून आहे.

महायुतीची बैठक पुढे ढकलली…

एकनाथ शिंदे यांची शिवसेना आणि भारतीय जनता पार्टी यांच्यात अद्याप समाधानकारक वाटाघाटी न झाल्यामुळे सरकार स्थापनेचा मुहूर्त लांबणीवर पडत आहे. काल महायुतीच्या तीनही नेत्यांची मुंबईत बैठक होणार होती. परंतु अचानक सातारा जिल्ह्यातील दरे येथे आपल्या मूळ गावी एकनाथ शिंदे निघून गेल्याने कालची बैठक रद्द करण्यात आली.

पुढील दोन दिवस महायुतीची बैठक होणार नसून भाजपच्या गटनेत्याची निवड झाल्यावर महायुतीची बैठक होणार असल्याची माहिती मिळत आहे. एकीकडे भाजपकडून मुख्यमंत्रीपदी देवेंद्र फडणवीसच विराजमान होणार असल्याचे स्पष्ट संकेत मिळत आहेत. तर दुसरीकडे भाजपने शिंदे गटातील चार नेत्यांच्या मंत्रिमंडळात समावेशाला विरोध दर्शवल्याने वाटाघाटीचा तिढा वाढतच चालला असल्याचे दिसत आहे.