टीम लोकमन मंगळवेढा |
लिव्ह इन रिलेशनशिपच्या जमान्यात कुटुंबातील पाच पिढ्या गुण्यागोविंदाने एकत्र नांदतात हा सुखद अनुभव आहे. वडिलधारी मंडळींच्या अनुभवाची शिदोरी घेऊन क्षिरसागर कुटुंब वाटचाल करीत आहे. अनुभव संपन्न ज्येष्ठांचा आदर सन्मान करणारा हा सोहळा अनुकरणीय असल्याचे प्रतिपादन छत्रपती परिवाराचे संस्थापक सुरेश पवार यांनी केले.
ओझेवाडी ता. पंढरपूर येथील माजी सरपंच तथा मारुती क्षिरसागर व डॉ. दत्तात्रय क्षिरसागर यांचे वडील तुकाराम क्षिरसागर यांचा सहस्त्रचंद्र दर्शन सोहळा संपन्न झाला. यावेळी सुरेश पवार यांचे ‘आपल्याच घरांत थोडसं डोकावूया’ या विषयावर व्याख्यान संपन्न झाले. यावेळी जवळपास एक हजारांहून अधिक उपस्थित नागरिक व महिला भगिनींशी पवार यांनी व्याख्यानातून संवाद साधला. सोशल मिडीयाचा प्रभाव, प्रसारमाध्यमांमुळे घराघरातूंन दिसणारे अस्वस्थ वास्तव, नात्यांमध्ये येत चाललेला कोरडेपणा, वृद्ध आई वडीलांची होणारी उपेक्षा, वाढत चाललेले वृद्धाश्रम व पाळणाघरे, कुटुंबातील सुसंवादाचा अभाव अशा विविध अंगांनी अनेक उदाहरणे देऊन वास्तवाची जाणीव करुन देत सर्वांना अंतर्मुख केले.
वास्तविक कुटुंबातील ज्येष्ठांच्या अनुभवाची संस्कार शिदोरी भावी पिढ्यांना अधिक समृद्ध करणारी असते मात्र उच्च करिअरच्या मागे धावणारी पिढी उंबरठ्यावरची भक्ती विसरत चालल्याचे विदारक चित्र अस्वस्थ करते. ज्यांनी हाताचा पाळणा करुन, तळ हातावरील फोडाप्रमाणे जपले अशा वृद्ध माता पित्यांच्या वृद्धापकाळी आधाराची काठी होण्याऐवजी घरातील अडगळ मानतात हे दुर्दैवी असल्याचे त्यांनी सांगितले. या पार्श्वभूमीवर क्षिरसागर कुटुंबातील 42 पारंब्यांचा वटवृक्ष असलेल्या तुकाराम क्षिरसागर यांचा अत्यंत आपुलकीने व जिव्हाळ्याने साजरा होणारा वाढदिवस आदर्शवत असल्याचे त्यांनी नमूद केले. या कार्यक्रमाच्या अध्यक्षस्थानी महाराष्ट्र राज्य प्राथमिक शिक्षक संघाचे माजी राज्याध्यक्ष बाळासाहेब काळे हे होते.
यावेळी भागवत गाडेकर, ह.भ.प. सावता महाराज यांचेहस्ते क्षिरसागर दांपत्याचा वाढदिवसानिमित्त तुळशीहार घालून व कुटूंबातील अबाल वृद्धांकडून पाद्यपूजा व औक्षण करुन सत्कार करण्यात आला. या कार्यक्रमाचे प्रास्ताविक मारुती क्षिरसागर यांनी केले. सूत्रसंचालन संतोष मिसाळ यांनी केले. यावेळी बाळासाहेब काळे, सौ. सुरेखा गोडसे, राजाराम गायकवाड, गुरव महाराज यांची समायोचित भाषणे झाली. यावेळी पंडित भोसले, माजी सरपंच अनिल वाघमोडे, उत्तमराव जमदाडे, रामभाऊ यादव, ज्ञानेश्वर मोरे, शांताराम गाजरे, तानाजी शिंदे यांच्यासह अनेक मान्यवर यावेळी उपस्थित होते. मातृ पितृ ऋण फेडणारा व कृतज्ञतापूर्वक आयोजित करण्यात आलेला हा सोहळा पंचक्रोशीतील जनतेसाठी अनुकरणीय ठरला. शेवटी डॉ. दत्तात्रय क्षिरसागर यांनी आभार मानले.
