सर्वात मोठी बातमी ! राज्यातील घडामोडींच्या पार्श्वभूमीवर शरद पवारांच्या सुरक्षेत वाढ ; पवारांना आता केंद्राची झेड प्लस सुरक्षा, अवतीभवती असणार सुरक्षेचे कडे आणि मोठा फौजफाटा

टीम लोकमन मंगळवेढा |

महाराष्ट्राचे माजी मुख्यमंत्री, माजी केंद्रीय संरक्षण आणि कृषिमंत्री, राष्ट्रवादी काँग्रेस शरदचंद्र पवार पक्षाचे राष्ट्रीय अध्यक्ष शरद पवार यांना आता केंद्राची झेड प्लस सुरक्षा मिळण्याची शक्यता आहे. राज्यातील घडामोडींच्या पार्श्वभूमीवर पवारांच्या सुरक्षित मोठी वाढ करण्यात आली आहे.

सध्या राज्याची झेड प्लस सुरक्षा शरद पवारांना आहे. मात्र आता केंद्राची देखील झेड प्लस सुरक्षा प्रदान करण्यात आली आहे. केंद्र शासनाने शरद पवारांच्या सुरक्षेबाबत मोठा निर्णय घेतला आहे. आता पवारांच्या अवतीभवती सुरक्षेचे मोठे कडे असणार आहे. आणि सोबत मोठा फौजफाटा सुद्धा तैनात असणार आहे.

शरद पवारांना आजपासून केंद्राची अतिरिक्त सुरक्षा देण्यात आली आहे. आजपासून सीआरपीएफचे दहा जवान शरद पवारांसोबत असणार आहे. नुकताच शरद पवारांसोबत सीआरपीएफच्या अधिकाऱ्यांना सुरक्षेचा आढावा घेतला आणि त्यानंतर शरद पवारांना सुरक्षा प्रदान करण्याचे निश्चित करण्यात आले आहे. सध्या राज्यात सुरू असलेल्या घडामोडींच्या पार्श्वभूमीवर सुरक्षा व्यवस्था वाढवण्याचा निर्णय घेण्यात आला आहे.

कोणताही अनुचित प्रकार घडू नये यासाठी खबरदारी

शरद पवारांच्या घरी अनेक बैठका आणि भेटीगाठी होत असतात. रोज अनेक नागरिक किंवा कामकाजासाठी नेतेमंडळी येत असतात. मात्र बदलापूर प्रकरणानंतर सध्या राज्यातील वातावरण तापले आहे. या पार्श्वभूमीवर कोणताही अनुचित प्रकार घडू नये यासाठी मोठी खबरदारी घेतली जात आहे.

आरक्षणाच्या पार्श्वभूमीवरही वातावरण तापण्याची शक्यता

शरद पवार आगामी निवडणुकीत संपूर्ण महाराष्ट्रातील वेगवेगळ्या जिल्ह्यांमध्ये फिरणार आहेत. शरद पवार काही महिन्यांपूर्वी मराठा नेते मनोज जरांगे पाटील यांच्या उपोषणस्थळी गेले होते. त्यावेळी रस्त्यात काही आंदोलकांनी त्यांच्या ताफ्याला काळे झेंडे दाखवले होते. आगामी काळात मराठा आरक्षण, ओबीसी आरक्षणाच्या पार्श्वभूमीवर वातावरण तापण्याची शक्यता आहे. त्यामुळेच शरद पवार यांच्या सुरक्षेत मोठी वाढ करण्यात आली असून आता त्यांच्या सुरक्षेसाठी केंद्राकडून झेड प्लस सुरक्षा असणार आहे.

Z+ सुरक्षा कोणाला दिली जाते?

Z+ सुरक्षा ही देशातील आणि राज्यातील अत्यंत अतिमहत्त्वाच्या व्यक्तींनाच दिली जाते. राष्ट्रपती, पंतप्रधान, केंद्रीय गृहमंत्री, मुख्यमंत्री, उपमुख्यमंत्री यांना Z+ सुरक्षा दिली जाते. यात एका पोलीस अधिकाऱ्यासह दहापेक्षा जास्त एनएसजी कमांडो असतात. पहिल्या घेराव्यास एनएसजी जबाबदार आहे. दुसरा थर एसपीजी कमांडोद्वारे ठेवलेला आहे. त्यात आयटीबीपी आणि सीआरपीएफ जवानांचाही समावेश आहे. या सुरक्षेमध्ये एस्कॉर्ट आणि पायलट वाहनांची सुविधा देखील दिली जाते.