टीम लोकमन सोलापूर |
सोलापूर जिल्ह्यात डायरिया या आजाराचे प्रमाण वाढू नये म्हणून याबाबत मोठ्या प्रमाणात जनजागृती करण्यासाठी येत्या ३१ ऑगस्ट २०२४ पर्यंत दोन महिने कालावधीमध्ये अतिसार थांबवा (स्टॉप डायरिया) या विशेष अभियानाचा शुभारंभ सोलापूर जिल्हा परिषदेच्या मुख्य कार्यकारी अधिकारी मनिषा आव्हाळे यांच्याहस्ते करण्यात आला.
जिल्हा परिषदेचे मुख्य कार्यकारी अधिकारी यांच्या दालनात आज अतिसार थांबवा (स्टॉप डायरिया) या अभियानाचा व स्टिकरचा शुभारंभ मुख्य कार्यकारी अधिकारी मनिषा आव्हाळे यांच्याहस्ते करणेत आला. याप्रंसगी उपमुख्य कार्यकारी अधिकारी (ग्रामपंचायत) इशाधिन शेळकंदे, उपमुख्य कार्यकारी अधिकारी (पाणी व स्वच्छता) अमोल जाधव, ग्रामीण पाणीपुरवठा विभागाचे कार्यकारी अभियंता सुनिल कटकधोंड, कनिष्ठ प्रशासन अधिकारी सचिन सोनकांबळे, जिल्हा कार्यक्रम व्यवस्थापक सचिन जाधव, संवाद सल्लागार सचिन सोनवणे, प्रशिक्षण समन्वयक शंकर बंडगर, जिल्हा पाणी गुणवत्ता सल्लागार दिपाली व्हट्टे, सहाय्यक लेखाधिकारी अर्चना कणकी, घनकचरा सल्लागार मुकूंद आकुडे, सांडपाणी सल्लागार प्रशांत दबडे, क्षमता बांधणी सल्लागार महादेव शिंदे, सनियंत्रण व मुल्यमापन तज्ञ प्रतिक्षा गोडसे, आनंद मोची, योगेश कुंभार आदी उपस्थित होते.
केंद्र व राज्य शासनाच्या मार्गदर्शक सूचनेनुसार सोमवार १ जुलै पासून पुढील दोन महिने म्हणजे ३१ आॕगस्ट २०२४ पर्यंत अतिसार थांबवा (स्टॉप डायरिया) हे अभियान राबविण्यात येणार आहे. जिल्ह्यातील शाळा, अंगणवाडी, प्राथमिक आरोग्य केंद्र व सार्वजनिक ठिकाणी उपलब्ध होणाऱ्या पाण्याची तपासणी एफ.टी.के.द्वारे करण्यात येणार आहे यामध्ये दूषित आढळलेले पाणी नमुने पुढील तपासणीसाठी प्रयोगशाळेत पाठविण्यात येणार आहे.
जिल्ह्यात सर्व तालुकास्तरावर या अभियानाची मोठ्या प्रमाणात जनजागृती करण्यात येऊन ग्रामपंचायत व इतर शासकीय यंत्रणा, सर्व विभाग या अभियानात सहभाग घेऊन आठवडा निहाय नियोजन करण्यात आले आहे. गाव पातळीवर पाणी समितीची स्थापना, बळकटीकरण समितीद्वारे गाव पातळीवर पाण्याचे स्तोत्र स्वच्छता, स्वच्छ भारत मिशन (ग्रामीण) अंतर्गत गावे ओडीएफ प्लस करणे, गाव पातळीवर कार्यात्मक नळ जोडणी करणे, छतावरील पाणी संकलन हात पंप दुरुस्ती याबाबत प्रत्यक्ष गाव पातळीवर प्रभात फेऱ्या काढून जनजागृती करण्यात येणार असल्याचेही मुख्य कार्यकारी अधिकारी मनिषा आव्हाळे यांनी सांगितले.
