टीम लोकमन सोलापूर |
सोलापूर लोकसभा मतदारसंघातील महाविकास आघाडी तथा काँग्रेस पक्षाच्या उमेदवार प्रणिती शिंदे यांनी आपले वडील सुशीलकुमार शिंदे, आई उज्वला शिंदे यांच्यासह जागृती प्रशालेतील मतदान केंद्रावर आपल्या मतदानाचा हक्क बजावला.
या मतदान केंद्रावर मतदानासाठी मतदारांची मोठी गर्दी झाली होती. सकाळी सात वाजल्यापासून मतदान सुरू झाले आहे. सोलापूर मध्ये उष्णतेचे प्रमाण वाढत असल्याने उन्हापासून बचावासाठी मतदारांनी सकाळीच मतदान करण्याला पसंती दिल्याचे चित्र दिसत होते. त्यामुळे मतदान केंद्रावर मोठी गर्दी झाली होती.
काँग्रेसच्या उमेदवार प्रणिती शिंदे मतदान केल्यानंतर माध्यमांशी बोलताना म्हणाल्या, हुकूमशाही संपवण्यासाठी लढत आहे. मला शेतकऱ्यांच्या मालाला चांगला हमीभाव मिळवून द्यायचा आहे. सोलापूर दुष्काळमुक्त, सोलापूर खड्डे मुक्त, युवकांच्या हाताला रोजगार, विमानसेवा सुरू करायची आहे. त्यासाठी माझा प्रयत्न असून निश्चितच सोलापूरची जनता माझ्या पाठीशी राहील असा दावा त्यांनी यावेळी केला.
मतदानानंतर माजी केंद्रीय गृहमंत्री सुशीलकुमार शिंदे म्हणाले, ही लढाई संविधान वाचवण्याचे आहे आणि यासाठी आम्ही मरेपर्यंत प्रयत्न करू. 400 पार चा नारा दिला जातो मात्र दोनशे ही पार होणार नाहीत, त्यामुळे त्या चार जून रोजी पहा काय होते ते.
