टीम लोकमन मरवडे |
कलावंतांचे माहेरघर म्हणून लौकिक असलेल्या मरवडे फेस्टिव्हलचे यंदा रौप्यमहोत्सवी वर्ष आहे. दि. 17 मार्च 2025 पासून सुरु होणाऱ्या यंदाच्या पंचविसाव्या मरवडे फेस्टिव्हलचा आरंभ कलावंतांच्या आविष्काराने नटलेल्या शोभायात्रेने होणार असून यामध्ये शेकडो कलावंत सहभागी होणार असल्याची माहिती छत्रपती परिवाराचे संस्थापक तथा मरवडे फेस्टिव्हलचे संयोजक सुरेश पवार गुरुजी यांनी दिली.
तुकाराम बीजेच्या मुहूर्तावर संपन्न होणारी मरवडे गावची यात्रा कुस्तीच्या आखाड्यासाठी संपूर्ण पश्चिम महाराष्ट्रात प्रसिद्ध आहे. या गावयात्रेला जोडूनच छत्रपती परिवाराच्या वतीने सन 2000 पासून मरवडे फेस्टिव्हल सोहळ्याचे आयोजन करण्यात येते. कोरोना संकटकाळ वगळता दरवर्षी सातत्याने या कार्यक्रमाचे आयोजन करण्यात येत आहे. मागील चोवीस वर्षांत छत्रपती परिवाराने मरवडे फेस्टिव्हलमध्ये नाविन्यपूर्ण अनेक उपक्रम राबविले आहेत. शालेय विद्यार्थी व नवयुवकांच्या कला गुणांना अविष्काराची संधी देतानाच महाराष्ट्राची गौरवशाली लोकपरंपरा जतन करुन ठेवणार्या कलावंतांसाठी हक्काचे व्यासपीठ उपलब्ध करुन दिले आहे.
सोलापूर जिल्ह्यातील सर्वात मोठा व दिमाखदार सांस्कृतिक व साहित्यिक उपक्रमांची रेलचेल असलेला सोहळा म्हणून मरवडे फेस्टिव्हलकडे पाहिले जाते. यामध्ये प्रामुख्याने कवी संमेलने, नाटके, एकांकिका, एकपात्री प्रयोग, रेकॉर्ड डान्स, संगीत मैफिल, लोककला महोत्सव, जादूचे प्रयोग, हिपनाटीझम, कथा महोत्सव, हास्य दरबार, सप्त खंजिरी वादनाद्वारे प्रबोधनाचे कार्यक्रम, शाहिरी, गोंधळ गीत, लोकगीतांचे पारंपारिक कार्यक्रम अशा वैविध्यपूर्ण उपक्रमांचे आयोजन करुन संपूर्ण महाराष्ट्राच्या कानाकोपऱ्यातील सर्व प्रकारच्या कलावंतांना कला सादरीकरणाची संधी उपलब्ध करुन दिली जाते. शिवाय दरवर्षी साहित्यिक व कलावंतांना विविध राज्यस्तरीय पुरस्कारांनी गौरविण्यात येते.
त्यामुळे संपूर्ण महाराष्ट्रातील कलावंतांसाठी कला पंढरीचे असाधारण महत्त्व मरवडे नगरीला प्राप्त झाले आहे. यंदाच्या रौप्यमहोत्सवी वर्षानिमित्त मरवडे फेस्टिव्हलचा आरंभ कलावंत व लोककलावंतांच्या गौरवार्थ भव्य शोभायात्रेने दिनांक 17 मार्च रोजी दुपारी 3 वाजता होणार आहे. यामध्ये महाराष्ट्रातील पारंपारिक कलाप्रकार, पारंपारिक वाद्यांच्या गजरात ही शोभायात्रा निघणार आहे. यामध्ये बँड पथक, सूरसनयी ताफा, हलगीपथक, नाशिक ढोल या वाद्यांसह लेझिम संघ, गजीढोल, झांज पथक, नाशिक ढोलचा गजर ऐकावयास मिळणार आहे.
याशिवाय लोककला जतन करुन ठेवण्यामध्ये अनमोल योगदान देणारे शाहीरी पथक, वासुदेव, वारकरी दिंडी, पिंगळा, पोतराज, मरिआईचा गाडा, बहुरुपी, गोंधळी, धनगरी ओव्या, सोंगी भारुड, भेदीक गाणी, बंजारा तसेच राजस्थानी नृत्य प्रकार यांचा समावेश आहे. याशिवाय ऐतिहासिक शिवकालीन पेहरावातील वेशभूषा तसेच पारंपरिक वेशभूषेतील शेकडो अबालवृद्ध सहभागी होणार आहेत. यावेळी अनेक ठिकाणी Selfy तसेच Standy Point उभारण्यात येणार असल्याने पारंपरिक शोभायात्रेतील संस्मरणीय क्षणांचे साक्षीदार होण्याची संधी हजारो रसिकांना मिळणार आहे.
या शोभायात्रेत सहभागी होणाऱ्या कलाकार व कलापथकांना सन्मानचिन्ह, मानपत्र, फेटा, शाल, पुष्पहार देऊन गौरविण्यात येणार असून आर्थिक खर्चाची तरतूद करण्यात आली असून भोजनाची व्यवस्था करण्यात आली आहे. तरी या शोभायात्रेत सहभागी होण्यासाठी भ्रमणध्वनी क्रमांक 7057475610, 9421067107, 9764525281 या क्रमांकावर संपर्क साधावा असे आवाहन छत्रपती परिवाराच्या वतीने करण्यात आले आहे.
