टीम लोकमन सोलापूर |
संस्थेत नोकरीचे आमिष दाखवून अत्याचार केल्याप्रकरणी सोलापुरातील प्रसिद्ध उद्योजकासह दोघांवर गुन्हा दाखल करण्यात आला आहे. उद्योजक प्रदीप शिंगवी यांचेसह रेखा गुप्ता आणि शिलवंती बिराजदार अशी गुन्हा दाखल झालेल्यांची नावे आहेत. तर या प्रकरणतील पीडित महिलेविरोधात सुद्धा एक कोटी रुपयांची खंडणी मागितल्याप्रकरणी गुन्हा नोंद नोंद करण्यात आला आहे.
याबाबत मिळालेल्या माहितीनुसार, सोलापुरातील एका संस्थेत अधिक्षक पदावर नोकरी लावतो असे म्हणत आरोपी प्रदीप शिंघवी याने अत्याचार केला. तर संस्थेतल्या दोन महिलांनी पीडितेस धार्मिक कारणावरून हीन वागणूक दिल्याचा आरोप पीडित महिलेने केला आहे. मूळची मुंबईची असलेल्या या पीडित महिलेच्या तक्रारीवरून तिघांविरोधात भारतीय न्याय संहिता कलम 69 आणि ऍट्रॉसिटी कायद्याच्या विविध कलमानुसार गुन्हा दाखल करण्यात आला आहे.
महिलेने एक कोटीची खंडणी मागितल्याचा उद्योजकाचा आरोप
पीडित महिलेला संस्थेच्या कामातून काढण्यात आलेले होते. मात्र ती महिला संस्थेत अवैधरित्या राहत होती. कामावर पुन्हा घ्या अन्यथा तुमच्याविरोधात विनयभंगाचा गुन्हा दाखल करेन. अशी धमकी देत एक कोटी रुपयांची खंडणी पीडित महिलेने मागितल्याचा आरोप शिंगवी यांनी केला आहे. प्रदीप शिंगवी यांच्या फिर्यादीनुसार पीडित महिलेविरोधात देखील खंडणी मागितल्याचा गुन्हा दाखल करण्यात आला आहे.
तपासानंतरच पुढील कारवाई पोलिसांची माहिती
या प्रकरणात परस्परविरोधी तक्रार देण्यात आली आहे. पोलिसांनी फिर्यादीच्या म्हणण्यानुसार गुन्हा नोंद केला आहे. दोन्ही प्रकरणाचा सविस्तर तपास केल्यानंतरच पुढील कारवाई केली जाईल अशी माहिती सोलापूर तालुका पोलीस ठाण्याचे वरिष्ठ पोलीस निरीक्षक राहुल देशपांडे यांनी दिली आहे.
