टीम लोकमन सोलापूर |
अजितदादांच्या राष्ट्रवादी काँग्रेस पक्षाचे सोलापूरमधील युवा नेता आणि सरचिटणीस ओंकार महादेव हजारे (वय 32) यांचा मृतदेह रविवारी रात्री त्यांच्याच घरासमोर उभ्या असलेल्या बंद कारमध्ये आढळून आल्याने संपूर्ण जिल्ह्यात खळबळ उडाली आहे. पार्थ पवार यांचे निकटवर्तीय म्हणून त्यांची ओळख होती. या संशयास्पद मृत्यूमुळे सोलापूरच्या राजकीय वर्तुळात खळबळ माजली आहे.
रविवारी दुपारी ओंकार हजारे आपल्या घरासमोरील कारमध्ये बसले होते. मात्र दुपार उलटून गेल्यावरही ते बाहेर आले नाहीत. यामुळे घरच्यांना आणि शेजाऱ्यांना चिंता वाटू लागली. कारच्या काचेतून डोकावून पाहिल्यानंतर त्यांना ओंकार कारच्या सीटवर निपचित पडलेले दिसले. त्यानंतर तात्काळ कारचा दरवाजा तोडून त्यांना बाहेर काढण्यात आले आणि तातडीने रुग्णालयात हलविण्यात आले. मात्र डॉक्टरांनी त्यांना मृत घोषित केले.
या घटनेनंतर सोलापूर पोलिसांकडून प्राथमिक तपास सुरू करण्यात आला आहे. मृत्यूचे कारण अद्याप स्पष्ट झाले नसले तरी आत्महत्येचा संशय व्यक्त करण्यात येत आहे. मात्र याबाबत नेमका निष्कर्ष तपासानंतरच स्पष्ट होईल असे पोलिसांनी सांगितले आहे.
पार्थ पवारांचे जवळचे सहकारी
ओंकार हजारे हे केवळ सोलापूरमधील एक सक्रिय युवा नेतेच नव्हते तर ते राज्याचे उपमुख्यमंत्री अजितदादा पवार यांचे सुपुत्र पार्थ पवार यांचे विश्वासू सहकारी म्हणून संपूर्ण जिल्ह्यात परिचित होते. त्यांचा उपमुख्यमंत्री अजित पवार आणि पार्थ पवार यांच्या नेतृत्वाखाली सामाजिक आणि राजकीय कामांमध्ये सक्रीय सहभाग होता.
