टीम लोकमन मंगळवेढा |
महाराष्ट्रात महिला सुरक्षेचा प्रश्न अत्यंत गंभीर बनला असून राज्यात महिला अत्याचाराच्या अनेक घटना घडत आहेत. अशातच कोल्हापुर मध्ये एक अत्यंत धक्कादायक घटना घडली असून रुग्णालयात अतिदक्षता विभागात (ICU) मध्ये उपचार सुरु असलेल्या तरुणीवर चक्क पोलिसानेच अत्याचार केला आहे.
सदर पोलिस हा तरुणीचा जाब घेण्यासाठी रुग्णालयात गेला होता. यावेळी त्याने त्या अल्पवयीन तरुणीच्या छातीवरून हात फिरवत तिच्यावर अत्याचार केला आहे. पोलिसाच्या या कृत्यामुळे खळबळ उडाली आहे. यासंदर्भात त्या पोलीस कर्मचाऱ्याविरोधात शाहूपुरी पोलिस ठाण्यात गुन्हा दाखल करण्यात आला आहे.
चेतन दिलीप घाटगे असे तरुणीचे छेड काढणाऱ्या पोलिस कर्मचाऱ्याचे नाव आहे. पीडित तरुणी ही अल्पवयीन आहे. या तरुणीने हातावर वार करत आत्महत्येचा प्रयत्न केला होता. या घटनेत गंभीर जखमी झालेल्या तरुणीला उपचारासाठी कोल्हापुरातील एका खासगी रुग्णालयाच्या आयसीयूमध्ये दाखल करण्यात आले आहे. यावेळी हाॅस्पिटलमध्ये जबाब घेण्यासाठी गेलेला पोलीस कर्मचारी चेतन घाटगे याने अल्पवयीन मुलीसोबत गैरवर्तन केले आहे.
तू माझी मैत्रीण आहेस, काही अडचण आल्यास मला फोन कर असे म्हणत तिच्या पाठीवरुन, छातीवरुन हात फिरवला. पोलिस कर्मचाऱ्याचे गैरवर्तन पाहून तरुणीला धक्का बसला. या प्रकरणी पोलीस नाईक चेतन घाटगे याच्यावर पोक्सो अंतर्गत गुन्हा दाखल झाला आहे. चेतन घाटगे हा शाहूपुरी पोलीस ठाण्यामध्ये पोलीस नाईक पदावर कार्यरत आहे. जखमी मुलीचा जबाब नोंदवित असताना रुग्णालयाच्या अतिदक्षता विभागात पोलिसाकडूनच असभ्य वर्तन घडल्यामुळे सर्वत्र संताप व्यक्त होत आहे.
