टीम लोकमन सांगली |
पुण्यातील वैष्णवी हगवणे आत्महत्या प्रकरण ताजे असतानाच गर्भवती नवविवाहित महिलेने गळफास घेऊन आत्महत्या केल्याने खळबळ उडाली आहे. या नवविवाहितेवर धार्मिक दबाव टाकत पतीसह सासू, सासऱ्यांनी शारीरिक व मानसिक छळ करत आत्महत्येस प्रवृत्त केल्याचा गुन्हा कुपवाड पोलिसांत नोंद झाला आहे.
ऋतुजा ऊर्फ गौरी सुकुमार राजगे असे त्या मृत गर्भवती विवाहितेचे नाव असून तिचे वडील डॉ. चंद्रकांत पाटील (राहणार गुंडेवाडी, ता. मिरज) यांनी पोलिसात फिर्याद दिली आहे. कुपवाड पोलिसांनी या घटनेची गांभीर्याने दखल घेत पतीसह तिघांना तत्काळ अटक केली आहे. पती सुकुमार सुरेश राजगे (वय 29), सासू अलका सुरेश राजगे (वय 49), सासरा सुरेश राजाराम राजगे (वय 53, सर्व अश्विनी हौसिंग सोसायटी, यशवंतनगर, कुपवाड) अशी त्यांची नावे आहेत. सध्या तिघेही पोलिस कोठडीत आहेत.
पोलिसांनी दिलेली अधिक माहिती अशी, मृत ऋतुजा हिचा विवाह सुकुमार राजगे याच्याशी 2021 मध्ये झाला होता. सुकुमार हा मर्चेंट नेव्हीमध्ये सेकंड ऑफिसर म्हणून कार्यरत आहे. लग्नात जावयाला साडेचार तोळ्यांची चेन, अंगठ्या असा मानपान केला होता. सुकुमार याच्यासह त्याचे कुटुंबीय ख्रिश्चन धर्माचे अनुकरण, प्रार्थना व रीतिरिवाजाप्रमाणे राहत असल्याचे ऋतुजा आणि तिच्या कुटुंबीयांना लग्नापर्यंत माहित नव्हते. जून 2021 मध्ये ऋतुजा हिला पहिला वटपौर्णिमेचा सण सासू अलका हिने साजरा करू दिला नाही. त्यानंतर पती सुकुमार हा कामावर निघून गेला.
दरम्यान लग्नानंतरची पहिली दिवाळीही सासरच्या मंडळींनी साजरी करू दिली नाही. ‘आमच्या घरात दिवाळी सण साजरा करत नाहीत. तू आमच्यासोबत चर्चमध्ये प्रार्थनेसाठी येत जा. अशी संशयितांनी जबरदस्ती केली. तसेच ऋतुजा हिला स्पर्धा परीक्षांचा अभ्यासही करू दिला नाही. संशयितांनी तिला वारंवार त्रासही दिला. चर्चमध्ये प्रार्थना, पूजा करण्यासाठी वारंवार तगादा लावण्यात आला होता.
पती सुकुमार कडून ऋतुजाला मारहाण
दरम्यानच्या काळात ऋतुजा गर्भवती राहिली. त्यावेळी ख्रिश्चन धर्माप्रमाणेच गर्भसंस्कार करु असा दबावही तिच्यावर टाकण्यात आला. त्यानंतर पती सुकुमार याने ऋतुजाला मारहाणही केली. ऋतुजाच्या आत्महत्येपूर्वी वडिलांनी जावयासह सासरच्या मंडळींना समजावून सांगण्याचाही प्रयत्न केला होता. मात्र सततच्या त्रासाला आणि दबावाला ऋतुजा वैतागली होती. अखेर शुक्रवारी (दिनांक 6) तिने राहत्या घरी गळफास घेऊन आत्महत्या केली. त्यानंतर खळबळ उडाली. वडिलांच्या फिर्यादीनंतर पतीसह तिघांनाही अटक करण्यात आली आहे.
