टीम लोकमन सोलापूर |
सोलापूर पोलीस दलातील पोलिस कॉन्स्टेबलने आत्महत्या केल्याची धक्कादायक घटना घडली आहे. पोलिस कॉन्स्टेबलने राहत्या घरी गळफास घेऊन आत्महत्या केली असून महेश ज्योतीराम पाडुळे असे या आत्महत्या केलेल्या पोलिस कॉन्स्टेबलचे नाव आहे. ते सोलापूर पोलिस मुख्यालयात कार्यरत होते.
गावाकडे आपल्या बायको आणि मुलांना भेटायला गेले असता त्यांनी हे टोकाचे पाऊल उचलले आहे. पोलिसाच्या आत्महत्येने संपूर्ण सोलापूर पोलीस दलात खळबळ उडाली आहे.
मिळालेल्या माहितीनुसार, सोलापूर पोलिस मुख्यालयामध्ये कर्तव्यास असलेल्या महेश ज्योतीराम पाडुळे यांनी अज्ञात कारणावरून बार्शी तालुक्यातील वैराग येथील राहत्या घरी गळफास घेऊन आत्महत्या केली आहे. वैराग पोलिस स्टेशनमध्ये आकस्मिक मयत म्हणून नोंद करण्यात आली आहे. माढा तालुक्यातील अंजनगाव येथील मूळ रहिवासी असलेले महेश पाडुळे हे वैराग पोलिस ठाण्यामध्ये रुजू झाल्यानंतर आपल्या कुटुंबासह वैराग येथे राहत होते. त्यानंतर त्यांची बदली सोलापूर मुख्यालय येथे झाली होती.
बुधवारी महेश पाडुळे ड्युटीवरून घरी आले. घरी पोहचताच त्यांनी टोकाचे पाऊल उचलत राहत्या घरी गळफास घेऊन आत्महत्या केली. त्यांना वैराग येथील वैराग मल्टिस्पेशालिटी हॉस्पिटलमध्ये उपचारासाठी दाखल केले असता उपचारापूर्वीच त्यांचा मृत्यू झाल्याचे डॉक्टरांनी सांगितले. त्यांच्या पश्चात पत्नी, एक 6 वर्षांचा मुलगा, एक 8 वर्षांची मुलगी असा परिवार आहे. या घटनेचा पुढील तपास वैराग पोलिस करत आहेत.
