टीम लोकमन मंगळवेढा |
पुरोगामी महाराष्ट्राला काळीमा फासणारी अतिशय धक्कादायक घटना राज्यातील सिंधुदुर्गमधून समोर आली आहे. या घटनेने संपूर्ण राज्यात खळबळ उडाली आहे. भर बाजारात नराधम पतीने पत्नीला अंगावर पेट्रोल टाकून पेटवले. या घटनेत या महिलेचा मृत्यू झाला आहे.
सिंधुदुर्ग जिल्ह्यातील मालवणमध्ये ही घटना घडली आहे. प्रीती केळुस्कर वय 35 वर्ष असे या महिलेचे नाव आहे. या घटनेनंतर आरोपी पती फरार झाला होता मात्र पोलिसांनी त्याला आता ताब्यात घेतले आहे. या घटनेबाबत अधिक चौकशी सुरू असल्याची माहिती पोलिसांनी दिली आहे.
या संदर्भात अधिक माहिती अशी की, मालवणमध्ये पतीने पत्नीला पेट्रोल ओतून पेटवून दिल्याची घटना घडली आहे. यात 35 वर्षे प्रीती केळुस्कर यांचे निधन झाले आहे. सुशांत गोवेकर असे या प्रकरणातील आरोपी पतीचे नाव आहे. सदर घटनेनंतर तो फरार झाला होता. मात्र पोलिसांनी त्याच्या मुसक्या आवळल्याची माहिती मिळत आहे.
काल सायंकाळच्या सुमारास ही घटना मालवण एसटी बसस्थानक परिसरात घडली आहे. प्रीती केळुस्कर या एका शॉपमध्ये काम करत असताना पतीने भर बाजारात येऊन त्यांच्यावर पेट्रोल ओतून जाळण्याचा प्रयत्न केला. या घटनेत त्या गंभीर जखमी झाल्या होत्या. त्यांना उपचारासाठी तातडीने रुग्णालयात दाखल करण्यात आले होते. मात्र उपचार सुरु असतानाच त्यांना मृत्यूने कवटाळले.
आज सकाळीच आरोपी पतीला पोलिसांनी अटक केली आहे. सदर घटनेचा अधिक तपास सुरू असल्याची माहिती पोलिसांकडून देण्यात आली आहे. मात्र ही घटना नेमकी कशामुळे घडली याचे कारण अद्यापही अस्पष्टच आहे.
