सोलापूर : सुरज राऊत
शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे हे सोलापूर लोकसभा मतदारसंघातील महाविकास आघाडीचे उमेदवार प्रणिती शिंदे यांच्या प्रचारासाठी आज सोलापुरात येत असून त्यांची सोलापुरात जाहीर सभा होणार आहे.
दिवसेंदिवस लोकसभेचे रणांगण तापायला लागले आहे. राज्यात सोलापूर मतदारसंघातील निवडणूक ही लक्षवेधी ठरत असून सोलापूर जिल्ह्यात दिग्गज नेत्यांच्या तोफा धडाडताना दिसत आहेत. सोमवारी महाविकास आघाडीचे सोलापूर मतदारसंघातील उमेदवार आमदार प्रणिती शिंदे यांच्या प्रचारार्थ सोलापुरात शिवसेना पक्ष प्रमुख उद्धव बाळासाहेब ठाकरे यांची जाहीर सभा होणार आहे. माजी केंद्रीय कृषिमंत्री शरद पवार आणि शिवसेनेचे पक्षप्रमुख उद्धव ठाकरे या दोन्ही नेत्याची एकत्रित सभा होणार होती. मात्र शरद पवार हे या सभेला येणार नसल्याचे समजते.
सोलापूर लोकसभा मतदारसंघाची निवडणूक अधिक रंगतदार होत आहे. महाविकास आघाडीच्या उमेदवार प्रणिती शिंदे यांना पाठिंबा देणाऱ्या पक्षांची संख्या वाढतच आहे. त्यामुळे विरोधकांची धाकधूक वाढत असल्याचे चित्र या मतदारसंघात पहायला मिळत आहे. त्यामुळे विरोधकांकडून केंद्रातील दिग्गज मंत्र्यांची फौज सोलापूरातील भाजप उमेदवाराच्या प्रचारार्थ उतरवली जात आहे. मात्र इकडे आमदार प्रणिती शिंदे यांनी प्रचारात आघाडी घेतल्याचे चित्र सोलापूर मतदारसंघात दिसत आहे.
दरम्यान आमदार प्रणिती शिंदे यांच्या प्रचारार्थ महाविकास आघाडीच्या नेत्यांच्याही जाहीर सभांचा धडाका सोलापूर मतदारसंघात सुरू झाला आहे. राहुल गांधी, शरद पवार यांच्या पाठोपाठ आता शिवसेना पक्षप्रमुख उद्धव बाळासाहेब ठाकरे यांची देखील जाहीर सभा होणार आहे. ही सभा सोमवार दिनांक २९ एप्रिल २०२४ रोजी सायंकाळी ५ वाजता कर्णिकनगर येथील चिल्ड्रन्स गार्डन या मैदानावर आयोजित करण्यात आली आहे.
या सभेला सोलापूरच्या उमेदवार प्रणिती शिंदे, माजी केंद्रीय मंत्री सुशीलकुमार शिंदे यांच्यासह महाविकास आघाडीतील सर्व पक्षांचे पदाधिकारी उपस्थित राहणार आहेत. तरी सोलापूर मतदार संघातील पदाधिकारी आणि कार्यकर्त्यांनी मोठ्या संख्येने सभेसाठी उपस्थित राहावे , असे आवाहन महाविकास आघाडीचे नेत्यांनी केले आहे.
यावेळी संपर्कप्रमुख अनिल कोकीळ, शिवसेना उपनेते शरद कोळी, अस्मिता गायकवाड, संपर्कप्रमुख पुरुषोत्तम बरडे, माजी मंत्री उत्तमप्रकाश खंदारे, जिल्हाप्रमुख अनिल दासरी, गणेश वानकर यांच्यासह निवडणूक प्रमुख प्रकाश यलगुलवार, काँग्रेसचे शहराध्यक्ष चेतन नरोटे, काँग्रेसचे जिल्हा कार्याध्यक्ष तथा प्रभारी जिल्हाध्यक्ष ॲड. नंदकुमार पवार, सुरेश हसापुरे आदी पदाधिकारी आणि कार्यकर्ते उपस्थित राहणार आहेत.
