टीम लोकमन अहिल्यानगर |
अहिल्यानगर जिल्ह्यातील पारनेरमधील ढवळपुरी गावात वारकरी संप्रदायाला काळीमा फासणारी संतापजनक घटना समोर आली आहे. एका 17 वर्षाच्या अल्पवयीन मुलीवर अत्याचार केल्याचा आरोप कीर्तनकार यशवंत एकनाथ थोरात उर्फ अण्णासाहेब गुंजाळ याच्यावर करण्यात येत आहे.
आरोपीने गेल्या पाच वर्षांपासून मुलीवर वाईट नजर ठेवत वारंवार लैंगिक अत्याचार केल्याचा धक्कादायक प्रकार उघडकीस आला आहे. या भोंदू महाराजाने पीडितेला बांबूने बेदम मारहाण करून लोखंडी पक्कड गरम करून अंगाला चटके दिल्याचा आरोप पीडितेने पोलिसात दिलेल्या फिर्यादीत केला आहे. या प्रकरणी पोलिसांनी गुन्हा दाखल करत आरोपी कीर्तनकार गुंजाळ महाराजाला अटक केली आहे.
मुलगी आठवीत असल्यापासून अत्याचार
मिळालेल्या माहितीनुसार पीडिता इयत्ता आठवीत असल्यापासून म्हणजे मुलगी 14 वर्षाची असल्यापासूनच हा प्रकार सुरू होता. आरोपी पीडितेच्या शेजारीच राहत असल्याने दोन्ही कुटुंबांचे चांगले संबंध होते. याचाच गैरफायदा घेऊन आरोपीने पीडितेवर वाईट नजर ठेवली आणि तिच्यावर वारंवार जबरदस्ती केली. पीडितेने या कृत्याला विरोध करण्याचा प्रयत्न केला असता आरोपीने तिला व तिच्या कुटुंबाला जीवे मारण्याची धमकी देत तिला बेदम मारहाण केली.
कुटूंबाला संपवण्याची दिली होती धमकी
आरोपीची शिक्षण संस्था असून पीडितेचा भाऊ त्याच्या संस्थेत सचिव म्हणून कार्यरत आहे. याचा फायदा घेऊन आरोपीने पीडितेशी लगट केली व मुलगी घरी एकटी असताना त्याने तिला आपल्या वासनेची शिकार बनवले. पीडितेने त्याला विरोध केल्यानंतर त्याने तिला धमकावले की, मी दोन हाफ मर्डर केले आहेत. कोणाला सांगितले तर तुझ्या कुटुंबाला संपवून टाकीन. कुटुंबाला काही होऊ नये म्हणून पीडितेने आरोपीकडून सातत्याने होणारा छळ मुकाट्याने सहन केला.
घरी बोलावून पिडीतेला दिले लोखंडी पक्कडीचे चटके
10 मार्च 2026 रोजी आरोपीने पीडितेला फोन करून स्वतःच्या घरी बोलावले आणि तिने येण्यास नकार दिला असता कुटुंबाला संपवण्याची धमकी दिली. भीतीपोटी पीडिता तिथे गेली असता आरोपीने तिला एका रूममध्ये नेऊन बांबूने बेदम मारहाण केली आणि गॅसवर गरम केलेली लोखंडी पक्कड लावून तिला चटके दिले. त्यानंतर तिच्यावर बळजबरी केली. त्रास असह्य झाल्यानंतर पीडितेने 14 मार्च रोजी भावाकडे सर्व आपबिती कथन केली. त्यानंतर दोघांनी पारनेर पोलीस ठाण्यात धाव घेत गुन्हा दाखल केला आहे. पोलिसांनी तातडीने सूत्रे हलवत आरोपी यशवंत थोरात याला 15 मार्च रोजी पहाटे राहत्या घरातून अटक केली. त्याला न्यायालयात हजर केले असता 20 मार्चपर्यंत पोलीस कोठडी सुनावली आहे. या घटनेमुळे संपूर्ण अहिल्यानगर जिल्ह्यात संतापाची लाट उसळली असून भोंदू महाराजावर कठोर कारवाई करण्याची मागणी ग्रामस्थांकडून केली जात आहे.
