टीम लोकमन मंगळवेढा |
मंगळवेढा पंचायत समितीचे गटशिक्षणाधिकारी पोपटराव लवटे हे त्यांच्या 35 वर्षांच्या शैक्षणिक सेवेतून आज निवृत्त होत आहेत. कार्यतत्पर व शिस्तबद्ध अधिकारी म्हणून ओळख असलेल्या लवटे यांना त्यांच्या सेवाकाळात शासन व विविध सामाजिक शैक्षणिक संघटनांच्या वतीने पुरस्कारांनी सन्मानित करण्यात आले आहे.
मंगळवेढ्याचे गटशिक्षणाधिकारी असलेले पोपटराव लवटे हे मंगळवेढा तालुक्यातील नंदेश्वर गावचे सुपुत्र असून त्यांनी 1989 साली लक्ष्मीदेवी विद्यामंदिर रड्डे येथे सहशिक्षक म्हणून आपल्या शैक्षणिक कारकिर्दीस सुरुवात केली. त्यानंतर ते पंढरपूर येथील गौतम विद्यालयात माध्यमिक शिक्षक म्हणून रुजू झाले. तेथे सलग सहा वर्ष ज्ञानदानाचे अविरत कार्य केल्यानंतर त्यांची जिल्हा निवड मंडळाकडून शिक्षण विस्तार अधिकारी पदावर निवड झाली.
शिक्षण विस्तार अधिकारी म्हणून पहिली पोस्टिंग दक्षिण काशी म्हणून ओळख असलेल्या पंढरपूर येथे झाली. तेथे एक वर्ष उल्लेखनीय कामगिरी करून ते बदलीने मंगळवेढा पंचायत समितीमध्ये शिक्षण विस्तार अधिकारी म्हणून 1997 ला रुजू झाले. त्यानंतर 2012 पर्यंत सलग पंधरा वर्षे ते मंगळवेढा येथे अविरतपणे कार्यरत होते. या पंधरा वर्षाच्या कालावधीत त्यांनी अतिशय उठावदार काम केले आणि ते अल्पावधीतच मंगळवेढ्याच्या शैक्षणिक क्षेत्रात नावारूपाला आले.
सन 2012 मध्ये त्यांना पुन्हा पंढरपूर पंचायत समितीमध्ये शिक्षण विस्तार अधिकारी म्हणून बदलीने रुजू व्हावे लागले. तेथे पुन्हा 2019 पर्यंत सलग सात वर्षे त्यांनी आपल्या कार्याची झलक दाखवली. त्यानंतर 2019 मध्ये ते मंगळवेढा पंचायत समितीमध्ये गटशिक्षणाधिकारी म्हणून रुजू झाले 2019 ते 31 मे 2024 पर्यंत मंगळवेढा पंचायत समितीचे गटशिक्षणाधिकारी म्हणून त्यांनी अतिशय चमकदार कामगिरी केली. त्यांच्या कार्यकाळात मंगळवेढ्याचा शैक्षणिक आलेख सातत्याने उंचावत राहिला.
त्यांना त्यांच्या पस्तीस वर्षाच्या प्रदीर्घ शैक्षणिक सेवेत अनेक पुरस्कारांनी गौरविण्यात आले. त्यामध्ये त्यांना सोलापूर जिल्हा परिषदेचा आदर्श शिक्षक पुरस्कार, सोलापूर जिल्हा परिषदेचाच आदर्श शिक्षण विस्तार अधिकारी पुरस्कार, सोलापूर जिल्हा मागासवर्गीय शिक्षक संघटनेकडून आदर्श शिक्षण विस्तार अधिकारी पुरस्कार, प्राथमिक शिक्षक संघाकडून दिला जाणारा आदर्श अधिकारी पुरस्कार देखील त्यांना प्राप्त झाला. याशिवाय उल्लेखनीय कामगिरीबद्दल अनेक संस्थांकडून त्यांना सन्मानित करण्यात आले आहे.
अधिकारी असून सुद्धा 35 वर्षांची प्रदीर्घ सेवा ही पंढरपूर आणि मंगळवेढा या दोनच तालुक्यांमध्ये घरापासून अगदी जवळच अंतरावर त्यांना करता आली. त्यामुळे ते नशीबवान अधिकारी आहेत अशीही चर्चा अनेक वेळा होत असते. आज 31 मे रोजी पोपटराव लवटे हे त्यांच्या पस्तीस वर्षांच्या प्रदीर्घ शैक्षणिक सेवेतून निवृत्त होत आहेत. जरी ते शासकीय सेवेतून निवृत्त होत असले तरी त्यांनी आपल्या कौशल्याचा, बौद्धिक चातुर्याचा, वलयाचा वापर यापुढेही मंगळवेढा तालुक्याचा शैक्षणिक आलेख अधिकच उंच व्हावा यासाठी करावा हीच अपेक्षा. त्यांना सेवानिवृत्तीनंतरचे उर्वरित आयुष्य अतिशय आरोग्यदायी लाभो आणि जास्तीत जास्त शैक्षणिक सेवा त्यांच्या हातून घडो. हीच news87lokman च्या वतीने मनःपूर्वक सदिच्छा.
