टीम लोकमन मंगळवेढा |
जिल्हा परिषद प्राथमिक शाळा तळसंगी ता. मंगळवेढा येथील उपशिक्षक अशोक शंकर मलगोंडे हे शिक्षण क्षेत्रातील प्रदीर्घ सेवेतून सेवानिवृत्त होत आहेत त्यानिमित्ताने त्यांचा सेवापूर्ती सत्कार सोहळा गुरुवार दिनांक 24 एप्रिल 2025 रोजी सकाळी 11 वाजता आयोजित करण्यात आल्याची माहिती जिल्हा परिषद प्राथमिक शाळा तळसंगीचे मुख्याध्यापक चंद्रकांत मोहन पवार यांनी दिली.
जिल्हा परिषद प्राथमिक शाळा तळसंगी येथील उपशिक्षक अशोक शंकर मलगोंडे यांचा सेवापूर्ती सत्कार सोहळा गुरुवार दिनांक 24 एप्रिल रोजी सकाळी 11 वाजता जोगेश्वरी मंगल कार्यालय बायपास रोड मंगळवेढा जिल्हा सोलापूर येथे आयोजित करण्यात आला आहे.
मंगळवेढा पंचायत समितीचे गटविकास अधिकारी योगेश कदम यांच्या शुभहस्ते व मंगळवेढा येथील श्री संत दामाजी सहकारी साखर कारखान्याचे चेअरमन शिवानंद पाटील यांच्या अध्यक्षतेखाली होणाऱ्या कार्यक्रमास मंगळवेढा पंचायत समितीचे प्रभारी गटशिक्षणाधिकारी बिभीषण रणदिवे, प्रभारी शिक्षण विस्तार अधिकारी पुरुषोत्तम राठोड, प्रभारी शिक्षण विस्तार अधिकारी शाम सरगर, सोलापूर जिल्हा प्राथमिक शिक्षक सहकारी पतसंस्थेचे संचालक संजय चेळेकर, मरवडे केंद्राचे केंद्रप्रमुख निवृत्ती उर्फ तात्या सूर्यवंशी आदी मान्यवर उपस्थित राहणार आहेत.
मंगळवेढा तालुक्यातील डोणज येथील रहिवाशी असलेले अशोक शंकर मलगोंडे यांनी 25 एप्रिल 1990 रोजी जिल्हा परिषद प्राथमिक शाळा देशमुख वस्ती तालुका पंढरपूर येथून आपल्या शैक्षणिक सेवेला सुरुवात केली. त्यानंतर त्यांनी माळशिरस तालुक्यातील दसुर येथील जिल्हा परिषद प्राथमिक शाळेत तीन वर्ष शैक्षणिक सेवा केल्यानंतर त्यांची मंगळवेढा तालुक्यातील भाळवणी येथे जिल्हा परिषद प्राथमिक शाळेत बदली झाली.
भाळवणी येथे दोन वर्षांच्या शैक्षणिक सेवेनंतर त्यांची भालेवाडी तालुका मंगळवेढा येथील जिल्हा परिषद प्राथमिक शाळेत नियुक्ती करण्यात आली. 1995 ते 2008 अशी दीर्घकाळ भालेवाडी शाळेत शैक्षणिक सेवेनंतर सन 2008 ते 2023 असे प्रदीर्घ काळ जिल्हा परिषद प्राथमिक शाळा मरवडे येथे ज्ञानदानाचे कार्य केल्यानंतर सन 2023 पासून ते आजपर्यंत अशोक मलगोंडे हे जिल्हा परिषद प्राथमिक शाळा तळसंगी येथे उपशिक्षक म्हणून आपले कर्तव्य अतिशय निष्ठेने करीत आहेत. अतिशय शांत, संयमी मनमिळावू व विद्यार्थीप्रिय शिक्षक म्हणून त्यांची वेगळी ओळख आहे.
अशोक मलगोंडे हे शैक्षणिक सेवेसोबतच सामाजिक कार्यातही सक्रिय सहभाग नोंदवत असतात. नर्मदा पार्क येथील गणेश मंदिर व गणेश बालोद्यान उभारणीमध्ये त्यांचा मोलाचा वाटा आहे. त्यांचा होतकरू स्वभाव व दानशूर वृत्तीमुळे अनेकांना त्यांनी मदतीचा हात दिला आहे. शिक्षकांच्या विविध प्रश्नांसाठी उभारण्यात आलेल्या अनेक आंदोलनांमध्ये आणि मोर्चांमध्ये त्यांनी सक्रिय सहभाग नोंदवला आहे. प्राथमिक शिक्षकांच्या श्री संत दामाजी प्राथमिक शिक्षक सहकारी पतसंस्थेचे चेअरमन म्हणून देखील त्यांनी अतिशय उल्लेखनीय अशी कामगिरी केली आहे.
डोणज येथील अतिशय गरीब व शेतकरी कुटुंबात जन्मलेल्या अशोक मलगोंडे यांनी आपल्या मितभाषी स्वभावाने, कौशल्याच्या व बौद्धिक चातुर्याच्या जोरावर मंगळवेढा तालुक्याच्या शैक्षणिक क्षेत्रात आपला एक वेगळा ठसा उमटविला आहे व नावलौकिक प्राप्त केला आहे. त्यांच्या पत्नी देखील प्राथमिक शिक्षिका असून त्या जिल्हा परिषद प्राथमिक शाळा मरवडे येथे कार्यरत आहेत. त्यांची मोठी मुलगी अनुजा ही धाराशिव जिल्ह्यात तालुका पुरवठा अधिकारी म्हणून कार्यरत आहे तर मुलगा अक्षय हा राष्ट्रीयकृत बँकेत शाखा व्यवस्थापक म्हणून कार्यरत आहे.
गुरुवार दिनांक 24 एप्रिल 2025 रोजी सकाळी 11 वाजता जोगेश्वरी मंगल कार्यालय बायपास रोड मंगळवेढा येथे अशोक मलगोंडे यांच्या होणाऱ्या सेवापूर्ती सत्कार समारंभास शैक्षणिक क्षेत्रातील मान्यवरांनी मोठ्या संख्येने उपस्थित राहावे असे आवाहन सौ. लता मलगोंडे, अनुजा मलगोंडे व अक्षय मलगोंडे यांनी केले आहे.
