टीम लोकमन मंगळवेढा |
लोकसभा निवडणुकीची रणधुमाळी संपली असून आता पुढच्या काही महिन्यांमध्ये राज्यात विधानसभा निवडणुकीचा रणसंग्राम सुरु होणार आहे. त्या पार्श्वभूमीवर सर्वच राजकीय पक्षांनी तयारीला सुरुवात केली आहे. अशातच लोकसभा निवडणुकीत राज्यात चर्चेचा विषय ठरणारा माढा लोकसभा मतदारसंघ विधानसभेच्या निवडणुकीत देखील चर्चेत राहण्याची शक्यता आहे. कारण या विधानसभा मतदारसंघात राजकीय घडामोडींना वेग आला आहे. काँग्रेसचे ज्येष्ठ नेते आणि माजी आमदार धनाजीराव साठे यांच्या सुन व माढ्याच्या नगराध्यक्षा मिनल साठे यांनी राष्ट्रवादी काँग्रेस शरद पवार गटाचे प्रदेशाध्यक्ष जयंत पाटील यांची भेट घेतली आहे. त्यामुळे राजकीय चर्चांना उधाण आले आहे.
सध्या माढा विधानसभा मतदारसंघाचे बबनदादा शिंदे हे विद्यमान आमदार आहेत. ते राष्ट्रवादी काँग्रेस अजित पवार गटात आहेत. येणाऱ्या विधानसभा निवडणुकीत बबनदादा शिंदे यांचे सुपुत्र रणजितसिंह शिंदे हे निवडणुकीच्या मैदानात उतरणार असल्याची चर्चा आहे. त्यामुळे माढ्यात रणजितसिंह शिंदे विरुद्ध मिनल साठे असा सामना होणार असल्याचे बोलले जात आहे. मिनल साठे यांनी सांगलीत जयंत पाटील यांची भेट घेतली आहे. पण ही भेट सदिच्छ भेट होती. यामध्ये कोणतीही राजकीय चर्चा झाली नसल्याची माहिती मिनल साठे यांनी दिली. मात्र या भेटीमागे विविध राजकीय तर्क काढले जात आहेत. माढ्यातील साठे कुटुंब हे काँग्रेसशी एकनिष्ठ असलेले कुटुंब म्हणून ओळखले जाते. मध्यंतरी काही काळ साखर कारखाना अडचणीत असल्याने साठे कुटुंबाने भारतीय जनता पार्टीत प्रवेश केला होता. मात्र पुन्हा ते स्वगृही परतले आहेत.
माढ्यात शरद पवार गट विरुद्ध अजित पवार गटात सामना होणार?
सध्या माढा विधानसभा मतदारसंघात राजकीय घडामोडींना वेग आला आहे. विद्यमान आमदार बबनदादा शिंदे यांचे सुपुत्र रणजितसिंह शिंदे हे दररोज तालुक्यातील विविध गावांना भेटी देत आहेत. लहान मोठ्या कार्यक्रमांना हजेरी लावत आहेत. तसेच मिनल साठे देखील गावोगाव दौरे करत आहेत. विधानसभा निवडणुकीत या मतदारसंघात महायुतीकडून अजित पवार यांच्या राष्ट्रवादीला ही जागा मिळण्याची शक्यता आहे, तर महाविकास आघाडीकडून शरद पवार यांच्या राष्ट्रवादीला जागा सुटण्याची शक्यता आहे. त्यामुळे शिंदे विरुद्ध कोण? असा सवाल देखील उपस्थित केला जात आहे. कारण माढा तालुक्यात साठे यांच्याशिवाय आरोग्यमंत्री तानाजी सावंत यांचे बंधु शिवाजीराव सावंत यांचे देखील अस्तित्व आहे. त्यांचे साखर कारखाने, बँका, शिक्षणसंस्था आहेत. ते सध्या शिवसेना शिंदे गटात आहेत. त्यामुळे ते काय भूमिका घेतात याकडे देखील सर्वाचेच लक्ष लागलेले आहे. तसेच शरद पवार गटात संजय पाटील घाटणेकर, संजय कोकोटे हे देखील सक्रिय आहेत. त्यामुळे शिंदेच्या विरोधात कोण? असा सवाल उपस्थित केला जात आहे.
आमदार बबनदादा शिंदे सलग सहा वेळा विधानसभेवर
आमदार बबनदादा शिंदे यांचा माढा विधानसभा मतदारसंघात दांडगा जनसंपर्क आहे. सलग सहा वेळा ते माढा विधानसभेच्या निवडणुकीत निवडूण आले आहेत. साखर कारखाने, बँका, बाजार समित्या, जिल्हा दुध संघ या मोठ्या संस्थावर बबनदादा शिंदे यांचे वर्चस्व आहे. त्याचे सुपुत्र रणजितसिंह शिंदे हे सध्या सोलापूर जिल्हा दुध संघाचे चेअरमन आहेत. तसेच बबनदादा शिंदे साखर कारखान्याचे चेअरमन देखील आहेत. यामुळे शिंदे कुटुंबियांचा माढा तालुक्यात मोठा जनसंपर्क आहे.
मोहिते पाटलांच्या निर्णयाकडे सर्वांचेच लक्ष
दरम्यान, लोकसभेच्या निवडणुकीनंतर माढ्यात राजकीय समीकरणं बदलणार का? असा सवालही उपस्थित केला जातोय. कारण लोकसभेच्या निवडणुकीत महायुतीकडून भाजपचे रणजितसिंह निंबाळकर उभे होते. त्यांच्या विरोधात शरद पवार गटाचे धैर्यशील मोहिते पाटील मैदानात होते. या निवडणुकीत मोहिते पाटलांनी मोठ्या मताधिक्क्यानी निंबाळकरांचा पराभव केला होता. यामध्ये विशेष बाब म्हणजे माढा विधानसभा मतदारसंघातून मोहिते पाटलांना 52000 मतांचे मताधिक्य मिळाले आहे. या मतदारसंघावर आमदार शिंदे यांचे वर्चस्व आहे. त्यामुळे विधानसभेच्या निवडणुकीत मोहिते पाटील कोणाला पाठिंबा देणार की, त्यांच्याच परिवारातील उमेदवार उभा करणार? हे पाहणे देखील औत्सुक्याचे ठरेल.
अभिजीत पाटील काय भूमिका घेणार?
दरम्यान, विधानसभा निवडणुकीत अभिजीत पाटील काय भूमिका घेणार हा देखील महत्वाचा मुद्दा आहे. कारण शरद पवारांचे खद्दे समर्थक म्हणून अभिजीत पाटील यांची ओळख होती. मात्र लोकसभा निवडणुकीत त्यांनी रणजितसिंह निंबाळकरांचे काम केले. राज्य सरकारने त्यांच्या ताब्यातील विठ्ठल सहकारी साखर कारखान्याला अडचणीतून बाहेर काढण्याचे आश्वासन दिल्यामुळे त्यांनी लोकसभेला भाजपला मदत केली होती. मात्र आता विधानसभेला ते काय भूमिका घेणार हे पाहणे देखील महत्वाचे ठरणार आहे. कारण ते देखील विधानसभेच्या निवडणुकीसाठी इच्छुक असल्याचे बोलले जात आहे. सध्या माढा विधानसभा मतदारसंघात पंढरपूर तालुक्यातील 42 गावांचा समावेश आहे. त्यामुळे पंढरपूर तालुक्यातील मते सुद्धा महत्वाची ठरतात. अभिजीत पाटील हे पंढरपूर तालुक्यातील आहेत. त्यामुळे ते माढा मतदारसंघातून निवडणूक लढवणार का? हे पाहणे देखील महत्वाचे ठरणार आहे.
