टीम लोकमन मंगळवेढा |
सार्वजनिक शिवजयंती उत्सव मंडळ मंगळवेढा यांचेवतीने शिवजन्मोत्सव सोहळ्यानिमित्त आयोजित केलेल्या रक्तदान शिबिरात 356 शिवभक्तांनी उत्स्फूर्त रक्तदान करून सामाजिक बांधिलकी जोपासली. या रक्तदान शिबिराचे उद्घाटन सुप्रसिद्ध बालरोग तज्ञ, डॉ. सुरेश होनमाने यांचे शुभहस्ते, रोटरी क्लब ऑफ मंगळवेढा सिटीचे संचालक व सुप्रसिद्ध रेडिओलॉजिस्ट डॉ. दत्तात्रय घोडके यांच्या अध्यक्षतेखाली संपन्न झाले.
यावेळी डॉ. नितीन आसबे, डॉ. रविंद्र नाईकवाडी, डॉ. संदेश पडवळ, डॉ. अस्लम मुलाणी, डॉ. विवेक निकम, डॉ. अभिजित हजारे, डॉ. सुनील जाधव, डॉ. गिरीश मासाळ, डॉ. कैलास नरळे, डॉ. नितीन चौंडे, डॉ. देवदत्त पवार, डॉ. विपुल कट्टे यांचेसह मंडळाचे अध्यक्ष बाळासाहेब नागणे व हर्षद डोरले उपस्थित होते.
शिवजन्मोत्सव सोहळा साजरा करीत असताना सामाजिक बांधिलकी जपत असलेल्या सार्वजनिक शिवजयंती उत्सव मंडळाच्या वतीने प्रत्येक वर्षी रक्तदान शिबिराचे आयोजन केले जाते. महाराष्ट्रात सद्यस्थितीत रक्ताचा तुटवाडा भासत असताना समाजाचे आपण काही तरी देणे लागतो या विचाराने तरुणांनी मोठा प्रतिसाद देत रक्तदान केले.
यावेळी प्रत्येक रक्तदात्यांना प्रमाणपत्र देण्यात आले तर महिला रक्तदात्यांचा विशेष सन्मान करण्यात आला. कार्यक्रमाचे माजी अध्यक्ष प्रा. विनायक कलुबर्मे यांनी सूत्रसंचालन करून आभार मानले.
