टीम लोकमन मंगळवेढा |
आपल्या मुलाची बौद्धिक क्षमता पाहूनच पालकांनी विद्यार्थ्यांना कसे घडवावे याचा विचार करावा पालकांनी विद्यार्थ्यांकडून अनावश्यक अपेक्षा धरू नयेत असे प्रतिपादन डॉ. नसीमा पठाण यांनी केले.
मंगळवेढा महोत्सवांतर्गत शुक्रवारी विद्यार्थी पालक शिक्षक बदलत्या काळानुसार शैक्षणिक संदर्भ या विषयावर व्याख्यानाचे आयोजन करण्यात आले होते. याप्रसंगी त्या बोलत होत्या. व्यासपीठावर शिक्षण प्रसारक मंडळाचे उपाध्यक्ष प्रा. डॉ. सुभाष कदम, प्रशासन प्रमुख प्रा. डॉ. मीनाताई कदम, प्राचार्य रवींद्र काशीद, सुभाष बाबर, अजित शिंदे, कल्याण भोसले, रमेश पवार, उपस्थित होते.
यावेळी पुढे बोलताना पठाण यांनी सांगितले की, शिक्षक हा कधीच निवृत्त होत नसतो. विद्यार्थ्यांना ज्ञानदान करत असताना तो नेहमी उपयुक्त असणारा घटक आहे. घाई घाईत कधीच विद्यार्थी घडत नसतो. शाळेत शिकणारा विद्यार्थी समाजाच्या शाळेत देखील आयुष्यभर नवनवीन शिक्षण घेत असतो. यामध्ये सुद्धा त्यांना शिकवणारे शिक्षक मोलाची भूमिका बजावत असतात. सध्या विद्यार्थी डिप्रेशन मध्ये जाण्याचे प्रमाण वाढले आहे. यासाठी शैक्षणिक क्षेत्रातील त्याच्या भावना समजून घेणे आवश्यक झाले आहे. मुलांना काय हवं आहे यापेक्षा तो कशामध्ये व्यवस्थित आहे हे समजून घेणे गरजेचे आहे.
विद्यार्थ्यांना त्यांना मनासारखे शिक्षण मिळाल्यानंतर ते त्यात जीव ओतून शिक्षण घेतात. समाजामध्ये गरीब पालक सध्या विवंचनेत आहेत. जास्त फि आकारणाऱ्या इंग्रजी माध्यमाच्या शाळांमध्ये चांगले शिक्षण मिळते असा त्यांचा ग्रह असून त्या ठिकाणी त्याला शिक्षण मिळेल या अपेक्षा ते ठेवत आहेत. मात्र या देशाच्या उभारणीत मराठी माध्यमाच्या शाळेतून शिकणाऱ्या अनेक लोकांनी महत्त्वाची भूमिका पार पाडली आहे.
आपल्या विद्यार्थ्यांचा अभिमान वाटेल असे काम शिक्षकांनी करून ते विद्यार्थी भविष्यात त्यांच्यापेक्षा मोठ्या पदावर गेले पाहिजेत यासाठी शिक्षकांचा दरारा राहिला पाहिजे असेही डॉ. पठाण आपल्या भाषणात शेवटी म्हणाल्या. कार्यक्रमाचे सूत्रसंचालन अरुण दत्तू यांनी केले तर जयश्री माईनकर आभार मानले.
