टीम लोकमन मंगळवेढा |
माजी केंद्रीय मंत्री सूर्यकांता पाटील यांनी दोन दिवसांपूर्वीच शनिवारी भाजपच्या सदस्यत्वाचा राजीनामा दिला होता. मात्र, अवघ्या दोनच दिवसानंतर आज त्या शरद पवारांच्या नेतृत्वातील राष्ट्रवादी काँग्रेसमध्ये प्रवेश करण्याची दाट शक्यता आहे.
मागील 10 वर्षांपासून सूर्यकांता पाटील या भारतीय जनता पार्टीमध्ये कार्यरत होत्या. 2014 मध्ये त्यांनी भाजपमध्ये प्रवेश केला होता. सूर्यकांता पाटील यांचा शरद पवार गटातील पक्षप्रवेश मुंबईत होण्याची शक्यता आहे.
सूर्यकांता पाटील यांनी राष्ट्रवादी शरद पवार यांच्या समवेत अनेक वर्षे काम केले होते. त्यांच्या कामाची पावती म्हणून शरद पवार यांनी पाटील यांना केंद्रीय मंत्रीपदी काम करण्याची संधी दिली होती. केंद्रीय ग्रामविकास राज्यमंत्री म्हणून त्यांनी जबाबदारी सांभाळली होती. परंतु 10 वर्षांपूर्वी भाजपची केंद्रात सत्ता आली आणि पंतप्रधान नरेंद्र मोदी यांच्यावर विश्वास ठेवत सुर्यकांता पाटील यांनी भारतीय जनता पार्टीमध्ये पक्षप्रवेश केला होता.
भाजपात प्रवेशानंतर मागील 10 वर्षांपासून भाजपने पाटील यांना कोणतीही जवाबदारी दिली नाही. पक्षाच्या कुठल्याच निर्णय प्रक्रियेत पाटील यांना सहभागी करून घेतले जात नव्हते. महत्वाचे निर्णय घेतानाही त्यांचे मत विचारात घेतले जात नव्हते. त्यामुळे त्या पक्षनेतृत्वावर नाराज असल्याच्या चर्चा होत्या. अखेर त्यांनी भाजप पक्ष सदस्यत्वाचा आणि हदगाव विधानसभा संयोजक पदाचा राजीनामा दिला आहे.
नांदेडमध्ये भाजपला फटका बसणार
नांदेड जिल्ह्यात सुर्यकांता पाटील यांची डॅशिंग नेत्या म्हणून ओळख आहे. त्यांच्या राजीनाम्याने नांदेड जिल्ह्यात भाजपचे मोठे नुकसान होण्याची शक्यता आहे. तसेच राष्ट्रवादी काँग्रेस शरद पवार गटाची ताकत या भागात वाढणार आहे.
