टीम लोकमन मंगळवेढा |
राजधानी मुंबईत 13 वर्षांच्या मुलीवर आजोबांनीच लैंगिक अत्याचार केल्याची धक्कादायक घटना समोर आली आहे. पवईमध्ये ही घटना घडली असून याप्रकरणी पवई पोलिसांनी आरोपीविरोधात गुन्हा दाखल करत अवघ्या काही तासांमध्ये त्याला अटक केली आहे. या घटनेमुळे पवईमध्ये खळबळ उडाली आहे.
मिळालेल्या माहितीनुसार, पवईमध्ये 13 वर्षीय अल्पवयीन मुलीवर चुलत आजोबांनी लैंगिक अत्याचार केले. गेल्या महिन्याभरापासून या मुलीवर लैंगिक अत्याचार सुरु होते. मुलीचे आई-वडील कामावर गेल्यावर मुलीचा चुलत आजोबा हे घाणेरडे कृत्य करत होता. मुलीवर अत्याचार केल्यावर आरोपी तिला धमकी देखील देत होता. त्यामुळे पीडित मुलगी निमुटपणे सर्वकाही सहन करत होती.
याबद्दल कोणाला सांगितल्यास तुझ्या आई-वडिलांना जीवे मारेल अशी धमकी आरोपी पीडित मुलीला देत होता. पण त्रास असह्य होऊ लागल्यामुळे पीडित मुलीने घडलेल्या घटनेची माहिती आपल्या आईला दिली. त्यानंतर हा सर्व प्रकार उघडकीस आला. पीडित मुलीच्या आईने तात्काळ पवई पोलिस ठाणे गाठत यासंदर्भात तक्रार दाखल केली आहे.
पोलिसांनी घटनेचे गांभीर्य लक्षात घेऊन आरोपीविरोधात तात्काळ गुन्हा दाखल केला. पोलिसांनी आरोपीविरोधात बलात्कार आणि पॉक्सो कायद्याअंतर्गत गुन्हा दाखल करत तातडीने अटक केली. आरोपी 40 वर्षांचा असल्याची माहिती समोर आली आहे. अटकेनंतर पोलिसांनी आरोपीला कोर्टात हजर केले होते. कोर्टाने आरोपीची रवानगी पोलिस कोठडीत केली आहे. सध्या पीडित मुलीवर रुग्णालयात उपचार सुरु आहेत.
