टीम लोकमन मंगळवेढा |
शिक्षण प्रसारक मंडळ मंगळवेढा या संस्थेच्या सचिवा डॉ. प्रियदर्शनी कदम-महाडिक यांनी हाती घेतलेले हे अभियान पोषक पर्यावरणाचे मोठे द्योतक आहे. संतभूमी म्हणून परिचय असलेल्या मंगळवेढा भूमीला वृक्षभूमी असा लौकिक मिळून ओळखली जाईल असे प्रतिपादन पंढरपूर मंगळवेढा मतदारसंघाचे आमदार समाधान आवताडे यांनी केले. ते शुक्रवारी वटपौर्णिमा व योगदीन याचे औचित्य साधून शिक्षण प्रसारक मंडळ मंगळवेढा यांच्या संकल्पनेतून आयोजित करण्यात आलेल्या वृक्ष महोत्सव-२०२४ अंतर्गत दहा हजार झाडांचे वृक्षारोपण या पर्यावरण पूरक कार्याचा शुभारंभ करताना बोलत होते.
यावेळी सिनेअभिनेते शंतनु मोघे, अजय तपकिरे, शिक्षण प्रसारक मंडळाचे अध्यक्ष ॲड. सुजित कदम, उपाध्यक्ष डॉ. सुभाष कदम, डॉ. मीनाताई कदम, डॉ. प्रियदर्शनी महाडिक, प्रा. तेजस्विनी कदम, काँग्रेसचे ज्येष्ठ नेते व धनश्री परिवाराचे संस्थापक प्रा. शिवाजीराव काळुंगे, उद्योजक पवन महाडिक, श्रीधर भोसले, यतीराज वाकळे, प्राचार्य रवींद्र काशीद यांच्या उपस्थितीत व आमदार समाधान आवताडे यांच्या हस्ते संत चोखामेळानगर येथील कृष्ण तलाव परिसरात वृक्षारोपण करून करण्यात आला.
यावेळी पुढे बोलताना, आमदार आवताडे यांनी हे अभियान लोकजागृतीच्या माध्यमातून गतिमान करण्यासाठी आपण सर्वांनी उत्स्फूर्तपणे वृक्षारोपण करून जास्तीत-जास्त झाडांची निर्मिती करूया. तालुक्यात 45 हजार विद्यार्थी आहेत. आपण प्रत्येक विद्यार्थ्याला एक रोप देणार असून जास्तीत जास्त प्रमाणामध्ये वृक्षलागवड करण्याचे उद्दिष्ट साध्य करून जिल्ह्यात मंगळवेढा तालुका वृक्ष लागवडीमध्ये अग्रेसर ठेवूया असे आवाहनही त्यांनी यावेळी उपस्थिताना केले.
या वृक्षलागवड मोहिमेच्या संकल्पक डॉ. प्रियदर्शनी महाडिक यांनी आपले विचार मांडताना महाराष्ट्रात तापमान वाढ होत असून सोलापूर जिल्हा 45 अंश सेल्सिअसच्या पुढे गेला आहे. श्रीमंतांना एअर कंडिशनची सुविधा आहे. मात्र गोरगरीब लोकांना झाडांचाच आधार आहे. यासाठी निसर्गामध्ये वृक्षारोपणाची संकल्पना पूर्ण करण्याचे ठरवले. येत्या वर्षभरात या ठिकाणी शासनाच्या आहेत त्या ठिकाणी पारंपारिक वृक्षारोपण करण्याची तुमची तयारी असून चिंच, पिंपळ, वड, लिंब, करंजी या झाडाचे मानवी आरोग्याला मोठे फायदे आहेत. भविष्यात यापासून उत्पादन निर्मिती होऊ शकते. आपल्या मंगळवेढ्याची ज्वारी जीआय मानांकनामध्ये असून अन्नप्रक्रिया उद्योगांमधून मंगळवेढ्याच्या ज्वारीला येणाऱ्या काळात चांगले दिवस येतील. असा आशावाद यावेळी त्यांनी बोलताना व्यक्त केला.
या कार्यक्रमास मंगळवेढ्याचे तहसीलदार मदन जाधव, मंगळवेढा पंचायत समितीचे गटविकास अधिकारी योगेश कदम, शिवसेना शहरप्रमुख दत्तात्रय भोसले, संपादक दिगंबर भगरे, वारी परिवाराचे संस्थापक सतीश दत्तू, प्रफुल सोमदळे, ॲड. प्रकाश घुले, शाम पवार, चोखामेळानगरचे सरपंच शिवाजी सरगर, कैलास कोळी, आनंद मुढे, माऊली कोंडूभैरी, सुरेश मेटकरी यांचेसह प्राचार्य, मुख्याध्यापक, शिक्षक, शिक्षकेत्तर कर्मचारी व स्थानिक नागरिक, पर्यावरण प्रेमी आणि विद्यार्थी मोठ्या संख्येने उपस्थित होते.
वृक्षदिंडीने वेधले सगळ्यांचे लक्ष…
इंग्लिश स्कूल मंगळवेढा या प्रशालेतील विद्यार्थ्यांनी वृक्षदिंडी बनवून वारकऱ्यांच्या वेशभूषेमध्ये ही दिंडी शहरातून चोखामेळा नगर येथील कृष्णा तलावाकडे मार्गस्थ झाली. ही दिंडी इतकी आकर्षित होती की शहरातील नागरिकांचे लक्ष या दिंडीने वेधले होते.
