टीम लोकमन मंगळवेढा |
सोमवारी मंगळवेढा शहरातील आठवडा बाजार परिसरात मंगळवेढा पोलीस स्टेशन व मंगळवेढा नगरपालिका यांच्या संयुक्त विद्यमाने श्री संत दामाजी चौक ते मुरलीधर चौक व आठवडा बाजार परिसरात वाहतूक व्यवस्थापनासाठी विशेष मोहीम राबविण्यात आल्याची माहिती मंगळवेढा पोलीस स्टेशनच्या वाहतूक शाखेचे संभाजी यादव यांनी दिली.
यामध्ये वाहतुकीस अडथळा करणारे हातगाडे, हॉकर्स, भाजीपाला विक्रेते, बेशिस्त वाहन पार्किंग करणारे वाहनधारकांना शिस्त लावून भाजीपाला, फळे व इतर साहित्य विक्रेते यांना बाजार तळावरील बाजार कट्ट्यावर बसण्यास सांगण्यात आले. तसेच बेशिस्त वाहनधारकांना योग्य प्रकारे वाहन पार्किंग करणे बाबत सूचना देऊन वाहतूक सुरळीत करण्यात आली. यापुढेही सदरची मोहीम नियमित चालू राहणार असून बेशिस्त वाहनधारकांवर कडक कायदेशीर कारवाई करण्यात येणार आहे.
या कारवाईत पोलीस निरीक्षक दत्तात्रेय बोरीगीड्डे यांच्या मार्गदर्शनाखाली मंगळवेढा पोलीस स्टेशन वाहतूक विभागाकडील पोलीस हवालदार संभाजी यादव, पोलीस कॉन्स्टेबल सुरज साळुंखे, प्रवीण जाधव, मंगळवेढा नगरपालिकेचे बाजार विभाग लिपिक बाबासाहेब पवार, आरोग्य निरीक्षक चंदनशिवे, बाजार विभाग सहायक संतोष घाडगे, मुकादम बंडोपंत मनेरी व शिपाई नागनाथ राजमाने यांनी सहभाग घेतला होता.
