टीम लोकमन मंगळवेढा |
क्ष किरण वैज्ञानिक अधिकार्‍यांना महाराष्ट्र पॅरामेडिकल कौन्सिलची नोंदणी करणे व प्रमाणपत्र प्राप्त करणे बंधनकारक असते. या प्रमाणपत्रासाठी 40 हजार रुपयांची लाच घेताना लाचलुचपत प्रतिबंधक विभागाने सापळा रचून महाराष्ट्र पॅरामेडिकल कौन्सिलचे प्रबंधक व दोन लिपिकांना रंगेहाथ पकडले आहे.
प्रबंधक सुरेश पाटील (वय 60), लिपिक विशाल चव्हाण (वय 35), अमित महागंडे (वय 38) अशी अटक केलेल्यांची नावे आहेत. तक्रारदार हे क्ष -किरण वैज्ञानिक अधिकारी म्हणून सांगली जिल्ह्यातील आष्टा ग्रामीण रुग्णालयात कार्यरत आहेत. त्यांच्या नियुक्तीनंतर त्यांना महाराष्ट्र पॅरामेडिकल कौन्सिलची नोंदणी करणे व प्रमाणपत्र प्राप्त करणे बंधनकारक असते.
त्यानुसार तक्रारदार यांनी मुंबईतील महाराष्ट्र पॅरामेडिकल कौन्सिलकडे अर्ज सादर केला होता. तक्रारदार हे 13 जानेवारी रोजी प्रमाणपत्र घेण्यासाठी गेले. त्यावेळी पॅरामेडिकल कौन्सिलचे प्रबंधक सुरेश पाटील यांनी प्रमाणपत्र देण्याकरीता तक्रारदार यांच्याकडे 40 हजार रुपये लाचेची मागणी केली. तक्रारदार यांनी 15 जानेवारी रोजी मुंबईतील लाचलुचपत प्रतिबंधक विभागाकडे तक्रार केली.
त्याच दिवशी पडताळणी करण्यात आली. तेव्हा लिपिक विशाल चव्हाण याने तक्रारदार यांच्याकडे प्रमाणपत्र देण्याकरीता 40 हजार रुपये लाचेची मागणी केल्याचे निष्पन्न झाले. त्यानंतर 16 जानेवारी रोजी सापळा लावण्यात आला होता. लिपिक विशाल चव्हाण याच्या सांगण्यावरुन लिपिक अमित महागंडे याने 40 हजार रुपयांची लाच स्वीकारली. त्यानंतर लगेचच लाचलुचपत प्रतिबंधक विभागाने तिघांनाही ताब्यात घेतले.
अपर पोलीस आयुक्त संदीप दिवाण, अपर पोलीस आयुक्त अनिल घेरडीकर आणि राजेंद्र सांगळे, सहायक पोलिस आयुक्त मनीषा झेंडे, पोलीस निरीक्षक संतोष गुर्जर यांच्या मार्गदर्शनाखाली ही कारवाई करण्यात आली. याप्रकरणी पोलीस निरीक्षक सुप्रिया गावडे अधिक तपास करीत आहेत.
