टीम लोकमन सोलापूर |
लोकसभा सार्वत्रिक निवडणुकींतर्गत जिल्ह्यातील सोलापूर व माढा या दोन लोकसभा मतदार संघाची मतमोजणी 4 जून रोजी रामवाडी येथील शासकीय गोदामात होत असून मतमोजणीसाठी निवडणूक यंत्रणा सज्ज आहे. अशी माहिती जिल्हाधिकारी तथा जिल्हा निवडणूक अधिकारी कुमार आशीर्वाद व माढा लोकसभा मतदारसंघाच्या निवडणूक निर्णय अधिकारी मोनिका सिंह ठाकुर यांनी दिली.
सोलापूर आणि माढा लोकसभा मतदार संघांची मतमोजणी रामवाडी गोदाम येथे होणार आहे. सकाळी ईव्हीएम यंत्रे आणि टपाली मतपेट्या ठेवलेल्या सुरक्षा कक्षांचे (स्ट्राँग रुम) सील निवडणूक निरीक्षक, निवडणूक निर्णय अधिकारी आदी तसेच उमेदवार आणि उमेदवारांचे प्रतिनिधी यांच्या उपस्थितीत काढल्यानंतर आवश्यक ती प्रक्रिया करुन मतमोजणीला प्रारंभ केला जाईल.
निवडणूकीच्या मतमोजणीची फेरीनिहाय आकडेवारी मतमोजणी केंद्राच्या ठिकाणाहून ध्वनीक्षेपकाद्वारे वेळोवेळी घोषित केली जाईल. मतमोजणी केंद्रामध्ये उमेदवार, निवडणूक प्रतिनिधी तसेच मतमोजणी प्रतिनिधी यांना मोबाईल सोबत बाळगण्यास सक्त मनाई करण्यात आली आहे. वैध ओळखपत्र नसलेल्या कुठल्याही अनधिकृत व्यक्तीला मतमोजणी कक्षात प्रवेश दिला जाणार नाही. प्रसार माध्यम कक्षात टेलिफोन, फॅक्स मशिन, इंटरनेट, टीव्ही आदी आवश्यक सुविधा उपलब्ध राहणार आहेत.
मतमोजणीसाठी टेबल आणि फेऱ्यांची रचना
सोलापूर आणि माढा लोकसभा मतदार संघात विधानसभा मतदारसंघनिहाय स्वतंत्रपणे मतमोजणी टेबल लावण्यात येणार आहेत. सोलापूर लोकसभेची मतमोजणी प्रक्रिया 108 टेबलद्वारे होणार आहे. मोहोळ विधानसभा मतदारसंघासाठी प्रत्येकी 14 टेबल आणि 24 फेऱ्या, सोलापूर शहर उत्तर विधानसभा मतदार संघासाठी 14 टेबल 20 फेऱ्या, सोलापूर शहर मध्य विधानसभा मतदार संघासाठी 14 टेबल 27 फेऱ्या, अक्कलकोट विधानसभा मतदार संघासाठी 14 टेबल 27 फेऱ्या, सोलापूर दक्षिण विधानसभा मतदार संघासाठी 14 टेबल 26 फेऱ्या तर पंढरपूर विधानसभा मतदार संघासाठी 14 टेबल 25 फेऱ्या होणार आहेत. तसेच ईटीपीबीएस मतमोजणीसाठी 14 व पोस्टल मतमोजणी साठी 8 टेबल लावण्यात येणार आहेत.मतमोजणी प्रक्रियेसाठी 404 अधिकारी व कर्मचाऱ्यांची नेमणूक केली आहे.
माढा लोकसभेची मतमोजणी प्रक्रिया 130 टेबलद्वारे होणार आहे. करमाळा विधानसभा मतदारसंघासाठी प्रत्येकी 14 टेबल आणि 25 फेऱ्या, माढा विधानसभा मतदारसंघासाठी प्रत्येकी 14 टेबल आणि 25 फेऱ्या, सांगोला विधानसभा मतदार संघासाठी 14 टेबल 22 फेऱ्या, माळशिरस विधानसभा मतदार संघासाठी 14 टेबल 25 फेऱ्या, फलटण विधानसभा मतदार संघासाठी 14 टेबल 25 फेऱ्या तर माण विधानसभा मतदार संघासाठी 14 टेबल 27 फेऱ्या होणार आहेत. तसेच ईटीपीबीएस मतमोजणीसाठी 20 व पोस्टल मतमोजणी साठी 26 टेबल लावण्यात येणार आहेत.मतमोजणी प्रक्रियेसाठी 513 अधिकारी व कर्मचाऱ्यांची नेमणूक केली आहे.
सोलापूर लोकसभा मतदार संघात 2729 दिव्यांग मतदार आणि 85 वर्षावरील ज्येष्ठ नागरिक,भारतीय सैन्यात कर्तव्यावर असलेल्या जिल्ह्यातील 782 भारतीय सैनिक मतदार असे एकूण 3 हजार 511 मतदारांच्या टपाली मतपत्रिकांची मोजणी करण्यात येणार आहे. तसेच माढा लोकसभा मतदार संघात 5134 दिव्यांग मतदार आणि 85 वर्षावरील ज्येष्ठ नागरिक,भारतीय सैन्यात कर्तव्यावर असलेल्या एक हजार 832 भारतीय सैनिक मतदार असे एकूण 6 हजार 971 मतदारांच्या टपाली मतपत्रिकांची मोजणी करण्यात येणार सदर मत मोजणी सकाळी 8 वाजता सुरू करण्यात येणार आहे.
मतमोजणी केंद्रावर अधिकारी,कर्मचारी व उमेदवार प्रतिनिधी यांना ओळखपत्राशिवाय प्रवेश मिळणार नाही. मतमोजणी प्रक्रिया शांततेत पार पाडण्यासाठी उमेदवार, उमेदवार प्रतिनिधी, राजकीय पक्षांचे पदाधिकारी, कार्यकर्ते, नागरिक व पत्रकार बांधवांनी सहकार्य करण्याचे आवाहन जिल्हाधिकारी आशीर्वाद यांनी यावेळी केले.
