टीम लोकमन मंगळवेढा |
शिक्षण प्रसारक मंडळ, मंगळवेढा या संस्थेच्या वतीने संस्थेच्या सर्व शाखेतील मुस्लिम बंधू भगिनींसाठी इंग्लिश स्कूल मंगळवेढा येथे इफ्तार पार्टीचे आयोजन करण्यात आले होते. याप्रसंगी संस्थेचे अध्यक्ष ॲड. सुजित कदम, सचिवा प्रियदर्शनी महाडिक, संचालिका तथा उपप्राचार्या तेजस्विनी कदम, सहसचिव श्रीधर भोसले, संचालिका अजिता भोसले, संचालक यतिराज वाकळे, इंग्लिश स्कूल मंगळवेढा प्रशालेचे प्रभारी प्राचार्य सुनिल नागणे, पर्यवेक्षक सुहास माने, पर्यवेक्षिका लता ओमणे, युवा उद्योजक पवन महाडिक, इंग्लिश स्कूल भोसे प्रशालेचे प्राचार्य जयराम आलदर तसेच समाजातील प्रतिष्ठित मान्यवर, संस्थेच्या विविध शाखांमध्ये कार्यरत असलेले मुस्लिम शिक्षक, शिक्षिका व शिक्षकेतर कर्मचारी उपस्थित होते.
रमजान हा मुस्लिम धर्मियांचा पवित्र महिना आहे.या महिन्यात मुस्लिम बांधवांकडून निरंकार रोजे व उपवास केले जातात. रोजाबरोबर नमाज, कुराण पठण, विशेष प्रार्थना याद्वारे अल्लाची इबादत केली जाते. रोजा या शब्दाला अरबी भाषेत सोम असे म्हणतात याचा अर्थ थांबणे असा होतो.या पवित्र महिन्यात महिनाभर रोजे करणारे रोजेदार दिवसभर अन्न पाणी घेत नाहीत. यामुळे आपले इंद्रियांना व मनाला संयमाची आवश्यकता असते यामुळे मन एकाग्र करायला मदत होते. याच महिन्यात पवित्र कुराणाचे अवतरण झाले. या काळात जादा नमाज अदा करणे म्हणजे अल्लाहच्या आणखीन समीप जाणे होय.
रमजान म्हणजे बरकतीचा महिना. परस्परांमध्ये स्नेहभाव वाढविणारा हा महिना याचेच औचित्य साधून ॲड. सुजित कदम व तेजस्विनी कदम यांच्या संकल्पनेतून शिक्षण प्रसारक मंडळ मंगळवेढा या संस्थेने एक आगळावेगळा उपक्रम राबविला. हिंदू मुस्लिम ऐक्याचे प्रतीक यातून दिसून आले. सर्वप्रथम रोजा इफ्तार करण्यात आला. त्यानंतर प्रशालेमध्ये मगरीबा नमाजचे पठण करण्यात आले. त्यानंतर मुस्लिम शिक्षक बांधवांकडून पदाधिकाऱ्यांचा नमाजी टोपी व रुमाल देऊन सत्कार करण्यात आला.
याप्रसंगी विद्यार्थ्यांनी कवालीचा अप्रतिम असा कार्यक्रम सादर केला. शेवटी सर्वांनी मिळून स्नेह भोजनाचा आस्वाद घेतला. हा कार्यक्रम पार पडण्यासाठी प्रशालेतील शिक्षक आशपाक काझी, प्रा. अमजद खतीब, प्रा.जमीर मुलाणी तसेच युसुफ खाटीक व शिक्षकेतर कर्मचारी यांनी विशेष परिश्रम घेतले. याप्रसंगी मुस्लिम शिक्षक बांधवांकडून संस्थेचे आभार व्यक्त करण्यात आले. यावेळी संस्थेच्या सर्व शाखातील मुस्लिम शिक्षक बंधू भगिनी व समाजातील प्रतिष्ठित लोक मोठ्या संख्येने उपस्थित होते.
