टीम लोकमन मंगळवेढा |
कोल्हापूरमधील काँग्रेसचे करवीर विधानसभा मतदार संघाचे आमदार पी एन पाटील यांचं आज पहाटे निधन झालं आहे. ते रविवारी पाय घसरून पडल्यानं त्यांच्या डोक्याला गंभीर इजा झाली होती.
मेंदूत होणारा रक्तस्त्राव शस्त्रक्रिया करूनही थांबला नव्हता. त्यामुळे त्यांची प्रकृती चिंताजनक होती. आज पहाटे उपचार सुरू असताना त्यांची प्राणज्योत मालवली. काँग्रेसचे एकनिष्ठ आमदार अशी त्यांची ओळख होती. त्यांच्यावर आज दुपारी एक वाजता सडोली खालसा येथे अंत्यसंस्कार करण्यात येणार असल्याची माहिती मिळत आहे.
लोकसभा निवडणुकीच्या धामधुमीत पी एन पाटील महाविकास आघाडीच्या प्रचारात सक्रीय होते. त्यावेळी त्यांना उष्माघाताचा त्रास जाणवत होता. त्यानंतर त्यांना कमी रक्तदाबाचा त्रासही सुरू झाला. त्यांची नियमित तपासणी करण्यात आली होती. त्यामध्ये कोणतेही दोष आढळले नव्हते. सर्व रिपोर्ट्स नॉर्मल होते.
मात्र पीएन पाटील रविवारी सकाळी बाथरूममध्ये गेले असताना पडले. त्यात त्यांच्या डोक्याला गंभीर इजा झाली. उपचारासाठी त्यांना तातडीने रुग्णालयात दाखल केले. मुंबईतील न्यूरोसर्जन डॉक्टर सुहास बराले यांनी त्यांच्यावर शस्त्रक्रिया केली. मात्र मेंदूत होणारा रक्तस्त्राव शस्त्रक्रिया करूनही थांबला नव्हता. त्यामुळे त्यांची प्रकृती चिंताजनक होती. आज पहाटे उपचार सुरू असताना अखेर त्यांची प्राणज्योत मालवली.
