टीम लोकमन मंगळवेढा |
लोकमंगल को-ऑप बँक लि. सोलापूर शाखा-मंगळवेढा यांच्यावतीने जागतिक महिला दिनानिमित्त नारीशक्ती पुरस्कार सोहळा नुकताच मोठ्या उत्साहात संपन्न झाला. कार्यक्रमाचे उद्घाटन मंगळवेढ्याच्या लोकनियुक्त नगराध्यक्षा सुनंदा बबनराव आवताडे यांच्या शुभहस्ते करण्यात आले. कार्यक्रमाच्या अध्यक्षस्थानी अंजलीताई समाधान आवताडे होत्या.
या वेळी प्रमुख पाहुणे म्हणून मंगळवेढा पंचायत समितीच्या सभापती दिपाली ताड, नगरसेविका विजया गुंगे, पंचायत समिती सदस्य जयश्री कवचाळे, मोहिनी गणपाटील, नगरसेविका सीमा बुरुजे, लोकमंगल बँकेच्या संचालिका उज्वला चेळेकर, मनोज रामचंद्र पाटील (यू.पी.एस.सी पात्र-रँक- 493) आदी मान्यवर उपस्थित होते. कार्यक्रमाचे प्रस्ताविक शिक्षक नेते संजय चेळेकर यांनी केले.
समाजातील विविध क्षेत्रात उल्लेखनीय कार्य करणाऱ्या महिलांचा नारीशक्ती पुरस्कार देऊन गौरव करण्यात आला. यामध्ये आरती कणिरे, विजया वाकडे, आशाताई नागणे, सुलोचना जानकर, सुलोचना इंगळे, दया वाकडे, मंगल बनसोडे, सुजाता क्षीरसागर, सानिया तांबोळी, रूपाली दत्तू, अर्चना लोखंडे, निलावती धायगोंडे, वंदना निकम, कांचन तानगावडे, गोविंदा संदेलो व शरयू सावंजी यांचा समावेश होता. कार्यक्रमातून महिलांच्या कर्तृत्वाचा गौरव करण्यात आला असून समाजातील महिलांना प्रेरणा देणारा हा सोहळा ठरला. प्रेम, त्याग आणि समर्पण प्रतिभेच्या आभाळाला गवसणी घालणाऱ्या आपल्या तालुक्यातील अनेक माता-भगिनींचा जागतिक महिला दिनानिमित्त नारीशक्ती पुरस्कार वितरण लोकमंगल को-ऑप बँक लि. सोलापूर शाखा-मंगळवेढा यांच्यावतीने आयोजित हा सोहळा केवळ एक कार्यक्रम नव्हता तर तो होता स्त्री-शक्तीच्या सन्मानाचा उत्सव होता.
सदरप्रसंगी क्रीडा, कला, सेवा, साहित्य, शिक्षण, उद्योग इत्यादी कार्यक्षेत्रामध्ये उल्लेखनीय कार्य करणाऱ्या महिला भगिनींचा नारीशक्ती पुरस्कार रूपाने सन्मान करण्यात आला. आरोग्य, शिक्षण आणि स्वावलंबन या त्रिसूत्रीवर भर देत, महिलांनी आता केवळ उंबरठा ओलांडायचा नाही, तर शिखर गाठायचं आहे, हा विश्वास यावेळी प्रत्येकीच्या डोळ्यात दिसत होता. कार्यक्रमास महिलांची मोठ्या संख्येने उपस्थिती होती. कार्यक्रमाचे सूत्रसंचालन व आभार भारती धनवे यांनी केले.
