टीम लोकमन सोलापूर |
घरफोडी करणाऱ्या उत्तर प्रदेशातील आरोपीला सोलापूर गुन्हे शाखेने अटक केली आहे. हा आरोपी घरफोडी करण्यासाठी विमानाने प्रवास करत महाराष्ट्रात यायचा. त्याच्यावर राज्यभरात तब्बल 35 गुन्हे दाखल आहे. विमानाने आलिशान प्रवास करून तो घरफोडी करायचा तसेच लखनौ येथे एक कोटीच्या आलिशान बंगल्यात राहत असल्याची माहिती देखील समोर आली आहे.
उत्तरप्रदेश मधून महाराष्ट्रात विमान प्रवास करून चोरटा मुंबईत यायचा. रेल्वेने तो सोलापूर गाठायचा. सोलापुरात घरफोडी केल्यानंतर परत तो उत्तर प्रदेश येथील लखनौ येथे जात असताना मुंबईतून विमानातून प्रवास करायचा. आंतरराज्य चोऱ्या, घरफोड्या करणाऱ्या एका अट्टल चोराला गुन्हे शाखेच्या पथकाने जेरबंद केले आहे. सोलापुरातील शिक्षणाधिकाऱ्याच्या घरी कोणी नसताना घरफोडी करून चोरी करणाऱ्या प्रकरणात आंतरराज्य गुन्हेगाराला सोलापूर गुन्हे शाखेने ताब्यात घेतले आहे. अनिल कुमार मिस्त्रीलाल राजभर असे अटक केलेल्या संशयित गुन्हेगाराचे नाव आहे. राजभर याच्यावर राज्यभरात तब्बल 35 गुन्हे दाखल आहेत.
सोलापुरातील शिक्षणधिकाऱ्याच्या घरी घरफोडी
अनिल कुमार राजभर हा उत्तर प्रदेश येथील लखनऊ शहरातील रहिवासी आहे. त्याच लखनऊ मधून तो घरफोडी करण्यासाठी विविध राज्यात जात असे, उत्तर प्रदेश येथून दुसऱ्या राज्यात चोरी किंवा घरफोडी करण्यासाठी विमानाने जात होता. त्या राज्यात गेल्यानंतर इतर शहरात जाण्यासाठी तो बाय रोड किंवा रेल्वे प्रवास करत असल्याचे समोर आले आहे. त्याने सोलापुरात शिक्षणधिकाऱ्याच्या घरी घरफोडी केली आहे.
11 तोळे सोने आणि 113 ग्रॅमचे चांदीचे दागिने जप्त
उत्तर प्रदेशमध्ये परत निघून गेला मात्र सोलापूर स्थानिक गुन्हे शाखेला अनिल कुमार राजभर हा गुन्हा करण्यासाठी सोलापुरात येत असल्याची माहिती मिळाली. पोलिसांनी त्याच्याकडून 11 तोळे सोने आणि 113 ग्रॅमचे चांदीचे दागिने असा एकूण नऊ लाख रुपयांचा ऐवज जप्त केला आहे. सोलापुरातील जेलरोड पोलीस आणि सिन्नर येथील गुन्हे उघडीस आले आहे.
उत्तर प्रदेश, महाराष्ट्र, कर्नाटकसह गुजरात राज्यात गुन्हे दाखल
अनिल कुमार राजभर याच्या विरोधात राज्यातील विविध ठिकाणी 35 हून अधिक गुन्हे दाखल आहेत. सोलापुरातील शिक्षणाधिकाऱ्याच्या घरी घरफोडी केल्यानंतर सोलापूर गुन्हे शाखेच्या अधिकाऱ्यांनी तपासाची चक्र वेगाने फिरवत राजभर याला जेरबंद केले. उत्तर प्रदेश येथील लखनऊ येथे अनिल कुमार राजभर याचा एक कोटी रुपयांचा बंगला असल्याचे समोर आले आहे. त्यामुळे अनिल कुमार राजभर याच्या चोरी आणि घरफोडी करण्यासाठी जात असताना विमान प्रवासाची सगळीकडे चर्चा होत आहे. उत्तर प्रदेश, महाराष्ट्र, कर्नाटक, गुजरात राज्यात अनिल कुमार राजभर याच्यावर गुन्हे दाखल असल्याचेही समोर आले आहे.
