टीम लोकमन मंगळवेढा |
नीट पेपरफुटी प्रकरणात मोठी अपडेट समोर आली आहे. लातूरमधून रविवारी दोन शिक्षकांना ताब्यात घेण्यात आले होते. या दोन्ही शिक्षकांवर गुन्हा दाखल करण्यात आला आहे. यांचे सह इतर दोघांवर लातूरच्या शिवाजीनगर पोलीस ठाण्यात गुन्हा दाखल करण्यात आला आहे. विशेष म्हणजे यातील एका शिक्षकाला अटक करण्यात आली आहे, तर दुसरा शिक्षक फरार झाला आहे.
शिक्षक धाराशिवमार्गे दिल्लीला पैसे पाठवत असल्याचेही समोर आले आहे. यात आतापर्यंत चार नावे समोर आली आहेत. यातील एक आरोपी हा दिल्लीचा असल्याची माहिती आहे. जलील पठाण याला अटक करण्यात आली आहे. तर संजय जाधव हा फरार झाला आहे. त्याला पकडण्यासाठी पोलिसांनी वेगवेगळी पथके रवाना केली आहेत. काल ताब्यात घेण्यात आलेला संजय जाधव आज फरार कसा झाला? असा प्रश्न विचारला जात आहे.
नीट परीक्षेदरम्यान मोठा गैरप्रकार झाल्याचे समोर येत आहे. देशभरातील विविध राज्यात याप्रकरणी कारवाई केली जात आहे. पेपरफुटीचा तपास सीबीआयकडे सोपवण्यात आला असून पेपरफुटीचे लातूर कनेक्शन समोर आले आहे. यात लातूरमधील दोन शिक्षकांचाही सहभाग असल्याचे समोर येत आहे. दोन्ही शिक्षक जिल्हा परिषदेचे शिक्षक असून ते पीएचडी धारक आहेत. आणि स्वत:चे कोचिंग क्लासेस देखील ते शिक्षक चालवत असल्याचे समोर येत आहे.
