मंगळवेढा तालुक्यातील बठाण येथे दोन ठिकाणी व मंगळवेढा शहरातील नर्मदा पार्क येथे दोन ठिकाणी अशा चार घरफोड्या चोरट्यांनी एका रात्रीत करून सुमारे पाच लाख 28 हजार रुपयांचे सोन्याचे दागिने व रोख रक्कम असा मुद्देमाल चोरट्यांनी लंपास केला आहे.
या घरपोळ्यांमुळे नागरिकांमध्ये भीतीचे वातावरण असून या घटनांबाबत मंगळवेढा पोलीस ठाण्यामध्ये अज्ञात चोरट्याविरुद्ध गुन्हे दाखल झाले आहेत.
याबाबत अधिक माहिती अशी की फिर्यादी गोपीचंद भोसले हे नर्मदा पार्क येथे वास्तव्यास असून त्यांचा भांडी विक्रीचा व्यवसाय आहे. फिर्यादीची बहीण बेळगाव येथे राहत असून तिच्या घरी कार्यक्रमानिमित्त भोसले परिवार घराला कडी कुलूप लावून गेले होते. सहा एप्रिल रोजी सकाळी दहा वाजता काशिनाथ भोसले यांनी फिर्यादीस फोन करून तुमच्या घरी चोरी झाली असल्याचे कळवले. त्यानंतर फिर्यादीने मंगळवेढ्यात येऊन प्रत्यक्ष पाहणी केल्यानंतर घराचे कुलूप कडी कोयंडा तोडून चोरट्यांनी घरात प्रवेश करून लोखंडी कपाटातील ड्रॉवरमध्ये ठेवलेले अडीच तोळे वजनाची सोन्याची साखळी, मन्याचे गंठण तसेच एक तोळ्याची सोन्याची चैन नसल्याचे दिसून आले.
दुसऱ्या घटनेत नर्मदा पार्क येथेच किसन तायप्पा मोटे हे घराला कुलूप लावून सोलापूर येथे गेले होते त्यांच्या घरातही अज्ञात चोरट्यांनी बेडरूम मध्ये ठेवलेल्या सुटकेस मधील एक तोळा सोन्याची अंगठी चोरून नेल्याची घटना घडली आहे. या दोन्ही घरात घरातील मिळून एकूण एक लाख 80 हजाराचा मुद्देमाल चोरट्यांनी चोरून नेला आहे.
तिसऱ्या घटनेत मंगळवेढा तालुक्यातील बठाण येथील धनाजी महाडिक यांचे दिनांक 5 एप्रिल ते सहा एप्रिल च्या दरम्यान घर फोडून एक लाख 60 हजार रुपये किमतीच्या चार तोळे सोन्याच्या पाटल्या तसेच रोख 20 हजार रुपये असा एकूण एक लाख 80 हजाराचा मुद्देमाल चोरट्याने लंपास केलाय.
चौथ्या घटनेत फिर्यादीचे चुलते ज्ञानेश्वर महाडिक यांच्या घराची कडी कोयंडा उचकटून घरात प्रवेश करून सोन्याचे दागिने रोख रक्कम असा एकूण एक लाख 68 हजार रुपयांचा मुद्देमाल चोरून नेल्याची फिर्याद दिली आहे.
एकाच रात्रीत झालेल्या या चार घरफोड्यांमुळे नागरिकांमध्ये भीतीचे वातावरण निर्माण झाले आहे या भागामध्ये पोलिसांनी रात्रीची गस्त वाढवावी अशी मागणी नागरिकांमधून होत आहे.
