जत : पांडुरंग कोळळी
संख ता.जत येथील अप्पर तहसीलदार सुधाकर मागाडे यांना ४८ तासांच्या आत जिवे मारण्याची धमकी उमदी ता.जत येथील सुमित नाटीकर या युवकाने सांगली जिल्हाधिकारी कार्यालयाच्या मेलवरती मेल करुन दिली आहे. त्यामुळे सांगली जिल्ह्यातील महसूल विभागात खळबळ उडाली आहे.
अधिक माहिती अशी की, उमदी येथील सुमित नाटीकर यांचा त्यांच्या भावकीतील लोकांशी शेतातील रस्त्यावरुन वाद होता. त्यामुळे तो वाद संखचे अप्पर तहसीलदार सुधाकर मागाडे यांच्याकडे न्यायप्रविष्ट असल्याने त्यांनी जागेची पाहणी करत सर्वांचे जाबजबाब घेऊन एकाच सर्व्हे नंबर मध्ये सर्वांची शेती असल्याने सुमित नाटीकर यांच्या शेतातून सर्वांना रस्ता देण्याचा आदेश ४ महिन्यांपूर्वी काढला होता. याचाच राग मनात धरून जिल्हाधिकारी यांच्या मेलवरती ४८ तासांच्या आत संखचे अप्पर तहसीलदार सुधाकर मागाडे यांचा खून करतो. असा मेल करून धमकी दिली आहे.
त्यामुळे महसूल विभागात खळबळ माजली आहे. वरिष्ठांच्या आदेशानुसार संखचे अप्पर तहसीलदार सुधाकर मागाडे यांनी उमदी पोलिस ठाण्यात संबंधितांवर गुन्हा दाखल केला असून अधिक तपास उमदी पोलिस करीत आहेत.
