टीम लोकमन मंगळवेढा |
राज्यात देवेंद्र फडणवीसांच्या नेतृत्वातील नवे सरकार स्थापन झाल्यानंतर आणि मुख्यमंत्रीपद गेल्यानंतर एकनाथ शिंदे यांना पहिला मोठा झटका बसला आहे. एकनाथ शिंदे यांचे अत्यंत विश्वासू असलेले मंगेश चिवटे यांच्याकडून मुख्यमंत्री सहाय्यता निधी विभागाचे प्रमुखपद काढून घेण्यात आले आहे.
मंगेश चिवटे यांना हटवून आता डॉ. रामेश्वर नाईक यांची मुख्यमंत्री सहाय्यता निधी विभागाच्या प्रमुखपदी नियुक्ती करण्यात आली आहे. मुख्यमंत्री कार्यालयाचे सचिव श्रीकर परदेशी यांच्याकडून रामेश्वर नाईक यांच्या नियुक्तीचे पत्र जारी करण्यात आले आहे. रामेश्वर नाईक यांच्याकडे यापूर्वी उपमुख्यमंत्री वैद्यकीय मदत कक्षाची जबाबदारी होती. धर्मादाय रुग्णालयात गरीब रुग्णांना मदत मिळवून देण्यात रामेश्वर नाईक यांचे मोठे योगदान आहे. त्यामुळेच त्यांच्याकडे मुख्यमंत्री सहाय्यता निधी विभागाच्या प्रमुखपदाचा कारभार सोपवण्यात आला आहे.
एकनाथ शिंदे हे मुख्यमंत्री असताना जनसामान्यांचा नेता म्हणून त्यांची प्रतिमा निर्माण होण्यात मुख्यमंत्री सहाय्यता निधी विभागाचा सिंहाचा वाटा होता. मुख्यमंत्री सहाय्यता निधीच्या माध्यमातून एकनाथ शिंदे यांनी अनेक गरजू रुग्णांवर मोफत उपचारासाठी मोठी मदत केली होती. यामध्ये मंगेश चिवटे यांची महत्त्वाची भूमिका होती. अगदी सोमवारी रात्री झालेल्या कुर्ला बस अपघातानंतरही मंगेश चिवटे तातडीने कामाला लागल्याचे दिसून आले होते. मंगेश चिवटे यांनी रुग्णालयात जाऊन कुर्ला अपघात प्रकरणातील जखमींची विचारपूस केली होती. या त्यांच्या दमदार कार्यशैलीमुळे मंगेश चिवटे यांनी स्वत:चे एक वेगळे स्थान निर्माण केले होते. एकनाथ शिंदे यांचा विश्वासू आणि खास मर्जीतील व्यक्ती म्हणून मंगेश चिवटे यांची ओळख होती.
अंतरवाली सराटी येथील मनोज जरांगे यांच्या उपोषणावेळी मंगेश चिवटे यांनी मध्यस्थाची भूमिकाही मोठ्या जबाबदारीने निभावली होती. मंगेश चिवटे हे अनेकदा एकनाथ शिंदे यांचा सांगावा घेऊन मनोज जरांगे पाटलांकडे जात असायचे. मनोज जरांगे यांनी आमरण उपोषण मागे घेण्यासाठी ज्या वाटाघाटी झाल्या होत्या त्यामध्ये मंगेश चिवटे यांचा सक्रिय सहभाग होता. त्यामुळे अल्प कालावधीतच प्रशासनात मंगेश चिवटे हे नाव प्रसिद्ध झाले होते. मात्र आता त्यांच्याकडून मुख्यमंत्री सहाय्यता निधी विभागाचे प्रमुखपद काढून घेण्यात आले आहे. हा एकनाथ शिंदे यांच्यासाठी मोठा झटका असल्याचे मानले जात आहे.
महाराष्ट्रातील सर्वात महत्त्वाचा कक्ष म्हणून रुग्णसेवा कक्षाकडे पाहिले जाते. देवेंद्र फडणवीसांच्या कार्यकाळात या कक्षाला महत्त्व प्राप्त झाले होते. गिरीश महाजन आणि रामेश्वर नाईक यांनी मुख्यमंत्री सहायता निधीच्या माध्यमातून रुग्णसेवा कक्षाचे काम अत्यंत प्रभावीपणे केले होते. देवेंद्र फडणवीस यांच्या पहिल्या टर्ममध्ये ओमप्रकाश शेट्ये यांच्याकडे मुख्यमंत्री सहाय्यता निधी विभागाची जबाबदारी होती. तर रामेश्वर नाईक यांच्याकडे गेल्या टर्ममध्ये उपमुख्यमंत्री वैद्यकीय सहाय्यता कक्षाची जबाबदारी होती.
