टीम लोकमन मंगळवेढा |
राज्यात पुन्हा एकदा EVM चा मुद्दा तापण्याची शक्यता आहे. लोकसभा निवडणुकीत राज्यात महाविकास आघाडीला मोठे यश मिळाले होते. तर महायुतीला मोठा धक्का बसला होता. अनेक दिग्गज नेत्यांना पराभवाला सामोरे जावे लागले होते.
मात्र त्यानंतर झालेल्या विधानसभा निवडणुकीमध्ये महायुतीने जोरदार मुसंडी मारत दमदार पुनरागमन केले. तर महाविकास आघाडीचा धक्कादायक रित्या मोठा पराभव झाला. महायुतीने राज्यात 232 जागा जिंकल्या तर महाविकास आघाडीला केवळ 50 जागांवरच समाधान मानावे लागले.
त्यानंतर आता विरोधकांकडून सातत्याने EVM वर शंका उपस्थित करण्यात येत आहे. मात्र आता याच मुद्द्यावर माजी मंत्री बच्चू कडू आणि शरद पवारांच्या राष्ट्रवादीचे सोलापूर जिल्ह्यातील माळशिरसचे आमदार उत्तमराव जानकर दिल्ली येथे 23 जानेवारीला मुख्य निवडणूक आयुक्तांची भेट घेणार आहेत. त्यानंतर आमदार उत्तमराव जानकर आपल्या आमदारकीचा राजीनामा निवडणूक आयोगाकडे सादर करणार आहेत.
माळशिरस तालुक्यातील मारकडवाडी गावानंतर धानोरे गावातून देखील EVM ला विरोध होत आहे. माळशिरस तालुक्यातील धानोरे गावात हात उंचावून पुन्हा मतदान घेण्यात आले. उत्तमराव जानकर यांना EVM मध्ये 963 मते धानोरे गावात पडली होती तर हात उंचावून प्रत्यक्ष मतदान घेतल्यानंतर त्यांना 1206 मते पडली. त्यामध्ये 243 मतांचा फरक पडला आहे.
धानोरे व मारकडवाडी या दोन्ही गावातील हजारो मतदारांनी बॅलेट पेपरवर मतदान घ्यावे असे प्रतिज्ञापत्र निवडणूक आयोगाच्या नावे तयार केले आहे. ते प्रतिज्ञापत्र 23 जानेवारीला निवडणूक आयोगाला प्रत्यक्ष जाणून देणार असल्याचे उत्तम जानकर यांनी म्हटले आहे. माजी मंत्री बच्चू कडू आणि आमदार उत्तमराव जानकर हे 23 जानेवारीला दिल्लीला जाऊन मुख्य निवडणूक आयुक्तांची भेट घेणार आहेत.
आमदार उत्तमराव जानकर आपल्या आमदारकीचा राजीनामा यावेळी 23 जानेवारी रोजी निवडणूक आयोगाकडे सादर करणार आहेत. निवडणूक आयोगाने माळशिरस विधानसभा मतदारसंघात जर पोटनिवडणूक जाहीर नाही केली तर दिल्ली येथे 25 जानेवारीपासून जंतर मंतरवर आंदोलन करणार असल्याचा इशाराही यावेळी उत्तम जानकर यांनी दिला आहे. त्यामुळे आता पुन्हा एकदा EVM चा मुद्दा तापण्याची शक्यता आहे. EVM च्या मुद्द्यावर सुरुवातीपासूनच शरद पवारांच्या राष्ट्रवादीचे आमदार उत्तमराव जानकर यांनी आक्रमक भूमिका घेतली आहे.
