मोठी बातमी ! शरद पवार भाकरी फिरवणार, रोहित पवारांचा ‘तो’ आग्रह अखेर पूर्ण होणार? शरद पवारांच्या राष्ट्रवादीत मोठ्या फेरबदलाचे संकेत, प्रदेशाध्यक्षपदी ‘या’ नेत्याची वर्णी लागणार तर युवकांचे नेतृत्व ‘या’ रोहितकडे येणार

टीम लोकमन मंगळवेढा |

राष्ट्रवादी काँग्रेस शरदचंद्र पवार पक्षात लवकरच मोठे फेरबदल होण्याची शक्यता आहे. अशी माहिती सूत्रांनी दिली आहे. शरद पवार लवकरच पक्षात मोठे बदल करणार असल्याची माहिती समोर येत आहे.

राष्ट्रवादी काँग्रेस SP पक्षाच्या प्रदेशाध्यक्षपदी सुनील भुसारा यांची वर्णी लागण्याची दाट शक्यता आहे. विद्यमान प्रदेशाध्यक्ष जयंत पाटील यांना विश्वासात घेऊनच फेरबदल होत असल्याची माहिती मिळत आहे. तसेच शरद पवारांचे नातू व कर्जत जामखेडचे आमदार रोहित पवार यांच्याकडेही महत्त्वाचे पद दिले जाईल अशी शक्यता वर्तवण्यात येत आहे.

मिळालेल्या माहितीनुसार, युवक प्रदेशाध्यक्षपदी स्वर्गीय आर आर आबांचे सुपुत्र व तासगाव कवठेमहांकाळचे आमदार रोहित पाटील यांना संधी दिली जाऊ शकते. रोहित पवार यांच्याकडे संघटनात्मक सरचिटणीस पदाची जबाबदारी दिली जाऊ शकते. मुंबईतील आठवडाभराच्या बैठकांनंतर संभाव्य पदाधिकाऱ्यांची यादीही निश्चित झाली असून शरद पवारांच्या होकारानंतर घोषणा होण्याची शक्यता आहे. तसेच पक्षातील ज्येष्ठ नेत्यांकडे विभागवार प्रभारीपदे वाटून दिली जाणार आहेत.

गेल्या आठवड्याभरापासून शरद पवार आणि सुप्रिया सुळे या मुंबईत होत्या. तेव्हा या सर्व गुप्त बैठका झाल्या होत्या. पक्षातील कोअर टीम या बैठकीला उपस्थित होती. तेव्हा या सगळ्या चर्चा झाल्या आहेत. गेल्या दोन महिन्यांपासून जयंत पाटील सातत्याने बोलताना दिसत होते की मला थोडा बदल हवाय. गेल्या आठ वर्षांपासून मी ही जबाबदारी सांभाळतोय, त्यामुळेदेखील हे बदल करण्यात येत आहेत का? असा सवाल उपस्थित होत आहे.

तसेच, विधानसभेच्या आधी आमदार रोहित पवार गट ॲक्टिव्ह झाला होता. रोहित पवारांना प्रदेशाध्यक्षपद हवे होते. पण तेव्हा जयंत पाटलांनी जाहिरपणे सुनावले होते. माझे दिवस मोजू नका मी पद देणार आहे. पण शेवटी निवडणुका झाल्यानंतर आठ महिन्यानंतर भाकरी फिरवणे गरजेचे होते. नव्या नेतृत्वाला पुढे आणणे गरजे होते. त्यातूनच ही सगळी चर्चा सुरू झाली होती. अशी चर्चा सर्वत्र होत आहे.

शरद पवार याच्यावर काय निर्णय घेतात हा अत्यंत महत्त्वाचा मुद्दा आहे. ही नावे एकमताने शिक्कामोर्तब झाली आहेत. रोहित पवार या बदलासाठी आग्रही असल्याचेही बोलले जात आहे. 10 तारखेला पक्षाचा वर्धापन दिन आहे तोपर्यंत बदल करावेत असा आग्रहदेखील नेत्यांकडून करण्यात येत आहे. संपूर्ण यादी तयार असून शरद पवारांनी ग्रीन सिग्नल दिल्यानंतरच हे बदल होणार आहेत अशी माहिती सूत्रांकडून मिळत आहे.