टीम लोकमन मंगळवेढा |
छत्रपती संभाजीनगरमध्ये लाचलुचपत प्रतिबंधक विभागाने मोठी कारवाई केली असून निवासी उपजिल्हाधिकारी विनोद खिरोळकर यांना 5 लाख रुपयांची लाच घेताना रंगेहात पकडले असून त्यांना अटक करण्यात आली आहे.
शेतजमिनीच्या वर्ग 2 ची जमीन वर्ग 1 मध्ये रूपांतरित करण्यासाठी त्यांनी तक्रारदाराकडून 23 लाख रुपये आधीच घेतले होते. त्यानंतर पुन्हा 18 लाखांची मागणी केली होती. त्यापैकी 5 लाख रुपये अव्वल कारकून त्रिभुवन यांच्यामार्फत घेताना पकडण्यात आले आहे.
महाराष्ट्रात गेल्या काही महिन्यांपासून सरकारी अधिकाऱ्यांकडून लाच घेण्याच्या घटनांमध्ये वाढ झाल्याचे दिसून येत आहे. अगदी ग्रामपंचायत अधिकाऱ्यांपासून ते तहसीलदारांपर्यंत अनेकांना लाचलुचपत प्रतिबंधक विभागाने कारवाई करत ताब्यात घेतले आहे. अलीकडच्या काळातच परभणी येथे एका महिला क्रीडा अधिकाऱ्यालाही लाच घेताना अटक करण्यात आली होती. आता छत्रपती संभाजीनगरमधील या निवासी उपजिल्हाधिकाऱ्यावर लाचलुचपत प्रतिबंधक विभागाकडून झालेल्या कारवाईमुळे पुन्हा एकदा खळबळ उडवली आहे.
जिल्हाधिकारी कार्यालयातील निवासी उपजिल्हाधिकारी विनोद खिरोळकर यांनी शेतजमिनीच्या वर्ग बदलासाठी तक्रारदाराकडून मोठ्या रकमेची मागणी केली होती. यापूर्वी 23 लाख रुपये घेतल्यानंतरही त्यांची हाव संपली नव्हती. त्यांनी पुन्हा 18 लाखांची अतिरिक्त मागणी केली. यातील 5 लाख रुपये घेताना लाचलुचपत प्रतिबंधक विभागाने सापळा रचून त्यांना आणि अव्वल कारकून त्रिभुवन यांना रंगेहात पकडले. या कारवाईमुळे छत्रपती संभाजीनगर जिल्ह्यातील प्रशासनात मोठी खळबळ उडाली आहे. यासंदर्भात पुढील तपास लाचलुचपत प्रतिबंधक विभागामार्फत सुरु आहे.
