टीम लोकमन पुणे |
विधानसभेच्या कसबा पोटनिवडणुकीत जायंट किलर ठरलेले काँग्रेसचे नेते रवींद्र धंगेकर अखेर काँग्रेसला रामराम ठोकणार आहेत. गेल्या काही दिवसांपासून रवींद्र धंगेकर हे शिवसेना एकनाथ शिंदे गटाच्या वाटेवर असल्याच्या चर्चा सुरू होत्या. विधानसभा निवडणुकीनंतर धंगेकर यांनी ठाण्यात जाऊन उपमुख्यमंत्री एकनाथ शिंदे यांची भेट घेतली होती. या भेटीनंतर धंगेकर काँग्रेस सोडून जाणार असल्याच्या चर्चा मोठ्या प्रमाणात रंगल्या होत्या.
काही दिवसांपूर्वी रवींद्र धंगेकर यांनी गळ्यात भगवा गमछा घातलेला फोटो आपल्या व्हॉट्सअप स्टेटसवर ठेवला होता. यानंतर त्यांच्या शिंदे गटातील प्रवेशावर शिक्कामोर्तब झाल्याचे समजले जात होते. मात्र माजी आमदार रवींद्र धंगेकर यांनी काँग्रेस सोडून कुठेही जाणार नसल्याचे स्पष्ट केले होते. मी काँग्रेस सोडून कुठेही जाणार नाही, मी आता काँग्रेस पक्ष संघटनेत सक्रीय होणार आहे असेही रवींद्र धंगेकर म्हणाले होते. पण आता अखेर रवींद्र धंगेकर एकनाथ शिंदे गटात जाणार असल्याचे निश्चित झाल्याचे बोलले जात आहे.
पुण्यात एकनाथ शिंदे यांनी काँग्रेसला मोठा धक्का दिला आहे. काँग्रेसचे माजी आमदार राहिलेले रवींद्र धंगेकर एकनाथ शिंदे यांच्या शिवसेनेत प्रवेश करणार आहेत. आज संध्याकाळी ठाण्यात हा पक्ष प्रवेश होणार आहे. यावेळी स्वत: एकनाथ शिंदे देखील उपस्थित राहणार आहेत. आगामी स्थानिक स्वराज्य संस्थांच्या निवडणुकीच्या तोंडावर धंगेकर यांनी काँग्रेसचा हात सोडल्याने पुण्यात काँग्रेसला मोठा धक्का बसला आहे. दिवसेंदिवस काँग्रेसला लागलेली गळती वाढतच चालली आहे.
गेल्या काही वर्षांमध्ये काँग्रेसने रवींद्र धंगेकर यांच्यावर प्रचंड विश्वास दाखवला होता. त्यांना कसबा पोटनिवडणुकीचे तिकीटही दिले होते. या निवडणुकीत त्यांनी भाजपच्या हेमंत रासने यांचा मोठा पराभव केला होता. यानंतर काँग्रेसने धंगेकर यांना पुण्यातून लोकसभेची उमेदवारी दिली. पण त्यांना भाजपच्या मुरलीधर मोहोळ यांच्याकडून पराभवाचा सामना करावा लागला. यानंतर विधानसभा निवडणुकीत काँग्रेसने कसब्यातून धंगेकरांना मैदानात उतरविले होते. पण इथंही त्यांचा पराभव झाला. काय म्हणता पुणेकर निवडून येणार धंगेकर ही त्यांची घोषणा लोकसभा आणि विधानसभेत देखील फोल ठरली. पण आता ते काँग्रेसला सोडून जाणार यावर शिक्कामोर्तब झाले आहे.
