टीम लोकमन मंगळवेढा |
नुकत्याच राज्यात पार पडलेल्या महाराष्ट्र विधानसभा निवडणूक निकालानंतर सर्वांनाच मोठा धक्का बसला आहे. विरोधी बाकावरील महाविकास आघाडीने इलेक्ट्रॉनिक व्होटिंग मशीनवर शंका उपस्थित केली असून ईव्हीएम विरोधात महाविकास आघाडीतील पक्षांकडून आंदोलनाची रुपरेषा आखली जात आहे. त्यामुळे महाराष्ट्रासह संपूर्ण देशात ईव्हीएम विरोधी आंदोलनाची धग वाढण्याचे संकेत मिळत आहेत.
सोलापूर जिल्ह्यामधील माळशिरस तालुक्यातील मारकडवाडी गावातील ग्रामस्थांनी ईव्हीएमविरोधात भूमिका घेत मतपत्रिकेवर मतदान घेण्याचा प्रयत्न केला होता. या आंदोलनाची संपूर्ण महाराष्ट्र राज्यासह देशभरात मोठी चर्चा झाली. आता याच गावात लोकसभेचे विरोधी पक्षनेते राहुल गांधी येणार असल्याची माहिती माळशिरसचे आमदार उत्तमराव जानकर यांनी दिली आहे. ईव्हीएम विरोधातील लाँग मार्चची सुरुवातच मारकडवाडी गावातून होणार असल्याचे त्यांनी सांगितले.
मारकडवाडी गाव आले होते चर्चेत…
राज्यातील विधानसभा निवडणूक निकालानंतर महाविकास आघाडीने ईव्हीएमवर शंका उपस्थित केली आहे. शिवाय देशभरातूनही ईव्हीएम विरोधात संतप्त भावना व्यक्त केली जात आहे. माळशिरस तालुक्यातील मारकडवाडी ग्रामस्थांनी ईव्हीएम मतांवर अविश्वास दाखवला. निवडणूक निकालात विद्यमान आमदार उत्तमराव जानकर यांना फारच कमी मते मिळाली असल्याचा मुद्दा ग्रामस्थांनी लावून धरला. ग्रामस्थांनी मतपत्रिकेवर मतदान घेण्याची घोषणा केली. मात्र प्रशासनाने ग्रामस्थांना अटकाव करत अभिरुप मतदानाला विरोध केला. ग्रामस्थांवर गुन्हे दाखल करण्याचा इशारा दिला त्यानंतर ग्रामस्थांनी मतदानाची प्रक्रिया मागे घेण्याचा निर्णय घेतला. मारकडवाडीतील गावकऱ्यांच्या या अभिनव आंदोलनाची देशपातळीवर मोठी चर्चा झाली.
लोकसभेचे विरोधी पक्षनेते राहुल गांधी मारकडवाडीत येणार
ईव्हीएमच्या मुद्यावर विरोधकांनी आक्रमक भूमिका घेतली आहे. ईव्हीएम विरोधात मोठे आंदोलन उभारण्याचा प्रयत्न विरोधकांकडून होत आहे. आता ईव्हीएम विरोधातील लाँग मार्च मारकडवाडीतून काढण्यात येणार आहे. या लाँग मार्चची सुरुवात लोकसभेतील विरोधी पक्षनेते राहुल गांधी करणार आहेत. राष्ट्रवादी शरद पवार गटाचे आमदार उत्तमराव जानकर यांनी यासंदर्भात माहिती दिली.
सोलापुरात महाविकास आघाडीकडून प्रतिकात्मक EVM मशीन फोडून आंदोलन करण्यात आले होते. सोलापुरातील ईव्हीएम विरोधी कृती समितीने आंदोलनाची हाक दिली होती. त्यानुसार हे आंदोलन झाले. यावेळी सोलापूर जिल्ह्यातील महाविकास आघाडीचे नेते आंदोलनात सहभागी झाले होते. यावेळी महाविकास आघाडीच्या कार्यकर्त्यांनी ईव्हीएम मशीनची प्रतिकृती फोडण्याचा तसेच जाळण्याचा प्रयत्न करण्यात आला. काँग्रेस नेते राहुल गांधी हे मारकडवाडीतून लाँग मार्च काढणार आहेत. मारकडवाडी येथे पडलेली ईव्हीएम विरोधातील ठिणगी देशभर वणवा पेटवणार असल्याचे जानकर यांनी म्हटले.
