टीम लोकमन मंगळवेढा |
भाजपचे ज्येष्ठ नेते मधुकर पिचड यांचे निधन झाले आहे. वयाच्या 84 व्या वर्षी त्यांनी अखेरचा श्वास घेतला. त्यांचा राष्ट्रीय काँग्रेस, राष्ट्रवादी काँग्रेस आणि नंतर भारतीय जनता पार्टी असा राजकीय प्रवास राहिला आहे.
शुक्रवारी सकाळपासूनच ज्येष्ठ नेते मधुकर पिचड यांची प्रकृती खालावली होती. गेल्या अनेक दिवसांपासून त्यांचेवर रुग्णालयात उपचार सुरु होते. ब्रेन स्ट्रोक आल्याने दोन महिन्यांपासून रुग्णालयात उपचार सुरु होते.
राष्ट्रवादी काँग्रेसचे ज्येष्ठ नेते तथा राष्ट्रवादी काँग्रेस पक्षाचे माजी प्रदेशाध्यक्ष मधुकरराव पिचड यांचे पुत्र माजी आमदार वैभव पिचड यांनी भारतीय जनता पार्टीत प्रवेश केला होता. मुलाच्या इच्छेखातर आपण भाजपमध्ये जात आहोत असे सांगून मधुकरराव पिचड देखील भाजपमध्ये दाखल झाले होते.
मधुकर पिचड राजकीय कारकिर्दीच्या सुरवातीपासून ते राष्ट्रवादी काँग्रेस पक्षाचे सदस्य आहेत. शरद पवार यांनी राष्ट्रवादी स्थापन केली तेव्हापासून मधुकरराव पिचड त्यांच्याबरोबर होते. त्यांनी राष्ट्रवादी काँग्रेस पक्षाचे महाराष्ट्राचे प्रदेशाध्यक्ष म्हणून काम पाहिले आहे. ते 1999, 2004, 2009, असे सलग तीनवेळा राष्ट्रवादी काँग्रेसमधून निवडून आले. यानंतर त्यांनी 2014 मध्ये त्यांचे पुत्र वैभव पिचड यांना अकोले मतदारसंघात राजकीय वारसदार म्हणून उतरवत विजयी केले होते.
मधुकर पिचड आणि त्यांचा मुलगा वैभव पिचड यांनी 2019 मध्ये भारतीय जनता पक्षात प्रवेश केला. मधुकरराव पिचड यांचे सत्तेतील राजकीय प्रवास प्रदीर्घ, असा राहिला आहे. माजी कॅबिनेट मंत्री राहिलेले मधुकरराव पिचड यांनी 1980 ते 2009 पर्यंत अकोले विधानसभा मतदारसंघातून महाराष्ट्र विधानसभेचे सदस्य म्हणून काम केले आहे.
मार्च 1995 ते जुलै 1999 या काळात ते महाराष्ट्र विधानसभेचे विरोधी पक्षनेते होते. 1980, 1985, 1990, 1995 या चार पंचवार्षिक निवडणुकीत सलग भारतीय राष्ट्रीय काँग्रेसकडून अकोले विधानसभा मतदारसंघातून निवडून गेले होते. या काळात त्यांना आदिवासी, आदिवासी विकास, दुग्धविकास, पशुसंवर्धन आणि मत्स्यव्यवसाय मंत्रालयात कॅबिनेट मंत्री म्हणून काम पाहिले आहे.
