मोठी बातमी ! राज्याचे माजी मुख्यमंत्री व शिवसेना पक्षप्रमुख उद्धव ठाकरे रुग्णालयात दाखल ; ठाकरेंवर तातडीने करण्यात आली ‘ही’ मोठी शस्त्रक्रिया, ऐन निवडणुकीत ठाकरेंना घ्यावी लागणार विश्रांती

टीम लोकमन मंगळवेढा |

राज्याचे माजी मुख्यमंत्री व शिवसेना उद्धव बाळासाहेब ठाकरे पक्षाचे पक्षप्रमुख उद्धव ठाकरे सोमवारी मुंबईतील एच.एन रिलायन्स रुग्णालयात चेकअपसाठी गेले आहेत. सकाळपासून उद्धव ठाकरे रुग्णालयातच आहेत. काही वर्षांपूर्वी त्यांची अँजिओप्लास्टी झाली होती.

अलीकडे त्यांना पुन्हा त्रास झाल्याची माहिती आहे. उद्धव ठाकरे हे आरोग्य तपासणीसाठी एच.एन रिलायन्स रुग्णालयात गेले होते. ठाकरेंच्या हृदयाच्या धमन्यांमधील ब्लॉकेज तपासण्यासाठी त्यांच्या चाचण्या केल्या. या चाचण्यांच्या रिपोर्टमध्ये ब्लॉकेज आढळल्याने उद्धव ठाकरेंवर पुन्हा एकदा अँजिओप्लास्टी करण्यात आली आहे. सकाळी 8 वाजता उद्धव ठाकरे रुग्णालयात उपचारासाठी दाखल झाले होते. यापूर्वीही 2012 साली उद्धव ठाकरेंवर लिलावती रुग्णालयात शस्त्रक्रिया करण्यात आली होती.

अँजिओप्लास्टी म्हणजे काय?

अँजिओप्लास्टी एक अशी शस्त्रक्रिया आहे ज्याचा उपयोग करून ह्दयाला रक्तपुरवठा करणाऱ्या धमन्यांमध्ये ब्लॉक झालेल्या धमन्या उघडण्यासाठी केला जातो. अँजिओप्लास्टी ओपन हार्ट सर्जरी शिवाय हृदयाच्या स्नायूंमध्ये रक्तप्रवाह पुनर्संचयित करते. हृदयविकाराचा झटका आल्यानंतर आपत्कालीन परिस्थितीत अँजिओप्लास्टी करण्यात येते. अँजियोप्लास्टीला परक्यूटेनियस कोरोनरी इंटरवेंशन (PCI) असेही म्हटले जाते.

अँजिओप्लास्टी करताना एक लांब पातळ ट्यूब (कॅथेटर) रक्त वाहिन्यांमध्ये टाकली जाते आणि ब्लॉक आर्टरीज उघडल्या जातात. कॅथेटरच्या टोकाला एक छोटा फुगा असतो. जेव्हा कॅथेटर एखाद्या ठिकाणी ठेवला जातो तेव्हा धमन्याच्या संकुचित भागात हा फुगा फुगवला जातो. यामुळे धमन्याच्या काठाला असलेले ब्लड क्लॉट दाबले जाते ज्यामुळे रक्तप्रवाह व्यवस्थित होण्यास मदत होते. अँजिओप्लास्टी केल्यानंतर डॉक्टर कॅथेटर बाहेर काढून टाकतात. ते ठिकाण झाकण्यासाठी एका पट्टीचा वापर केला जातो. यात सर्जिकल प्रक्रियेच्या तुलनेत कमी जोखिम असते.

डॉक्टर अँजिओप्लास्टीची शिफारस कधी करतात?

रुग्णाला छातीत दुखण्यासारखी लक्षणे दिसतात. ज्यामुळे हृदयाच्या स्नायूंना रक्तपुरवठा कमी होतो. अँजिओग्राफीने हृदयाच्या कोरोनरी धमन्या किंवा इतर धमन्यांमधील अडथळा दिसून येतो तेव्हा डॉक्टर अँजिओप्लास्टी करण्याचा सल्ला देतात. ही शस्त्रक्रिया करण्यासाठी 30 मिनिटे ते 3 तासापर्यंतचा वेळ लागतो. काही केसमध्ये अधिक वेळही लागू शकतो. अँजिओप्लास्टी केल्यानंतर रुग्णाला 1 ते 2 दिवसांत घरी सोडले जाते. साधारण एक आठवडा डॉक्टर त्या रुग्णांना विश्रांतीचा सल्ला देतात. कुठलाही व्यायाम न करण्याची सूचनाही डॉक्टर रुग्णांना करतात.