टीम लोकमन मंगळवेढा |
महाराष्ट्रात नुकत्याच पार पडलेल्या लोकसभा निवडणुकीनंतर उपमुख्यमंत्री अजित पवार यांच्या नेतृत्वातील अजित पवार गटात मोठी अस्वस्थता निर्माण झाली आहे. त्यामागील कारणही अगदी तसंच आहे. राष्ट्रवादी काँग्रेस शरदचंद्र पवार पक्षाने लोकसभेत राज्यभरात 10 जागांवर निवडणूक लढवली होती. यापैकी 8 जागांवर शरद पवार गटाच्या उमेदवारांचा विजय झाला आहे. तर अजित पवार गटाला केवळ रायगडच्या जागेवर विजय संपादन करता आला आहे. तसेच राज्यात महाविकास आघाडीला घवघवीत यश मिळाले आहे. या निवडणुकीनंतर लगेचच सहा महिन्यांनी राज्यात विधानसभेची निवडणूक होणार आहे. राज्यातील नागरिकांचा सध्याचा मूड हा महाविकास आघाडीच्या बाजूने आहे. त्यामुळे अजित पवार गटात अस्वस्थता असल्याची माहिती समोर येत आहे.
अजित पवार यांनी आपल्या पक्षाच्या आमदारांची आज बैठक बोलावली होती. या बैठकीला 5 आमदार गैरहजर होते अशी मागिती समोर आली आहे. लोकसभा निवडणुकीनंतर अजित पवार यांच्याकडून आता पक्षाला सावरण्याचा प्रयत्न केला जातोय. तसेच आगामी विधानसभेच्या निवडणुकीसाठी तयारी करण्याचा प्रयत्न अजित पवार गटाकडून केला जातोय. त्यामुळे अजित पवार गटात सध्या जोरदार हालचाली सुरु आहेत.
अजित पवार गटाच्या मंत्र्यांची आज अजित पवारांच्या ‘देवगिरी’ बंगल्यावर बैठक झाली. त्यानंतर सर्व आमदारांची ट्रायडेंट हॉटेलमध्ये बैठक पार पडली. या बैठकीला 5 आमदारांनी अनुपस्थिती होती. या पाचही आमदारांनी आपली कारणे पक्षाच्या वरिष्ठांना कळवल्याची माहिती समोर येत आहे. पण आमदारांच्या अनुपस्थितीवर राजकीय वर्तुळात मात्र जोरदार चर्चा सुरु आहेत.
अजितदादांच्या बैठकीला कोण-कोण अनुपस्थित?
अजित पवार गटाच्या आमदारांची आज बैठक पार पडली. या बैठकीला 5 आमदार उपस्थित नव्हते. मिळालेल्या माहितीनुसार, आमदार नरहरी झिरवळ, सुनील टिंगरे, राजेंद्र शिंगणे, अण्णा बनसोडे, धर्मराव बाबा आत्राम हे आमदार बैठकीला अनुपस्थित राहिले. मंत्रिमंडळाचा विस्तार लवकरात लवकर करावा, अशी चर्चा या बैठकीत झाल्याची माहिती सूत्रांकडून मिळत आहे. लोकसभा निवडणुकांमध्ये आलेल्या अपयशाबद्दलही या बैठकीत विचारमंथन झाल्याची शक्यता आहे.
या आमदारांनी गैरहजर राहण्यामागे काय कारणे दिली आहेत?
आमदार धर्मराव बाबा आत्राम यांनी आजारी असल्याचे पक्षश्रेष्ठांना कळवले आहे. त्यामुळे ते आजच्या पक्षाच्या बैठकीत उपस्थित राहू शकले नाहीत. आमदार नरहरी झिरवळ हे रशियाला गेले असल्याची माहिती समोर येत आहे. तर आमदार सुनील टिंगरे हे बाहेर आहेत अशी माहिती सूत्रांकडून मिळत आहे. आमदार राजेंद्र शिंगणे यांनी आजारी असल्याचे पक्षश्रेष्ठींना कळवले आहे. तर पिंपरी चिंचवडे आमदार आण्णा बनसोडे वैयक्तिक कारणास्तव बैठकीला गैरहजर राहिले आहेत. त्यांनी बैठकीला येणार नसल्याचे अजित पवार यांना कळवले होते असे सांगितले.
