टीम लोकमन सोलापूर |
सोलापूर-अक्कलकोट महामार्गावर कर्जाळ गावाजवळ मंगळवारी सकाळी भीषण अपघात झाला असून पुण्याहून अक्कलकोटकडे देवदर्शनासाठी निघालेल्या ट्रॅव्हल्स बसने महामार्गावर उभ्या असलेल्या ट्रकला जोरदार धडक दिली आहे. या अपघातात दोन जण ठार झाल्याची प्राथमिक माहिती असून, 30 ते 35 भाविक असलेल्या बसमधील अनेक प्रवासी जखमी झाले असून यात लहान मुलांचा देखील समावेश आहे.
ही ट्रॅव्हल्स बस पुण्याहून अक्कलकोटला देवदर्शनासाठी निघाली होती. बसमध्ये सुमारे 30 ते 35 भाविक प्रवास करत होते. कर्जाळ गावाजवळ महामार्गाच्या कडेला उभ्या असलेल्या ट्रकला भरधाव वेगाने आलेल्या बसने मागून जोरदार धडक दिली. या जोराच्या धडकेमुळे बसच्या डाव्या बाजूचे मोठे नुकसान झाले आहे. काही प्रवासी बसमध्ये अडकले होते. या अपघातानंतर घटनास्थळी मोठी खळबळ उडाली होती.
ट्रकला मागून धडक बसल्याने ट्रॅव्हल्सचा समोरच्या भागाचा पूर्णपणे चक्काचूर झाला आहे. अपघातानंतर स्थानिक नागरिक मदतीसाठी धावून आले आणि त्यांनी बसमध्ये अडकलेल्या प्रवाशांना बाहेर काढले. जखमींमध्ये लहान मुलांसह महिलांचाही समावेश आहे. दरम्यान, मृतांची ओळख अद्याप पटलेली नाही. या अपघातामुळे महामार्गावर काही वेळ वाहतूक मोठ्या प्रमाणात ठप्प झाली होती. पोलिसांकडून वाहतूक सुरळीत करण्यासाठी अतिरिक्त कर्मचारी तैनात करण्यात आले होते.








