टीम लोकमन बारामती |
पुणे जिल्ह्यातील माळेगाव सहकारी साखर कारखाना निवडणुकीच्या निमित्ताने गेल्या काही दिवसांपासून बारामतीत अनेक घडामोडी घडताना दिसत आहेत. राज्याचे उपमुख्यमंत्री अजित पवार यांनी आज कारखाना निवडणुकीच्या अनुषंगाने राष्ट्रवादी काँग्रेस आणि सहकारी संस्थांच्या पदाधिकाऱ्यांची बैठक घेतली. ज्येष्ठ नेते शरद पवार यांच्या गटाचे प्रमुख नेते आज उपमुख्यमंत्री अजितदादांना भेटल्याची माहिती समोर येत आहे त्यामुळे दोन्ही गट एकत्र येण्याचे संकेत मिळत आहेत.
दरम्यान माळेगाव सहकारी साखर कारखान्याच्या निवडणुकीच्या पार्श्वभूमीवर ज्येष्ठ नेते शरद पवार हे उद्या इच्छुकांची बैठक घेणार आहेत. या वेळी त्यांच्यासोबत राष्ट्रवादीचे युवा नेते युगेंद्र पवार सुद्धा उपस्थित असणार आहेत. त्यामुळे शरद पवार हे माळेगावच्या निवडणुकीत स्वतंत्र पॅनेल उतरविणार की अजित पवारांच्या पॅनेलला पाठिंबा देणार याबाबत मोठी उत्सुकता निर्माण झाली आहे. माळेगाव सहकारी साखर कारखाना निवडणुकीत राज्याचे उपमुख्यमंत्री अजित पवारांची राष्ट्रवादी, राष्ट्रवादी काँग्रेस शरदचंद्र पवार पक्षाचे पदाधिकारी आणि पवारांचे पारंपारिक विरोधक चंद्रराव तावरे, रंजन तावरे आणि कष्ठकरी शेतकरी समिती उतरली आहे.
उपमुख्यमंत्री अजित पवार आणि शरद पवार यांच्या गटाच्या उमेदवारांनी स्वतंत्रपणे प्रचाराला सुरुवात केली आहे. गावोगावी कोपरा सभा आणि घोंगडी बैठका घेतल्या आहेत. मात्र आता तीनही गटाचे पत्ते ओपन होण्यास सुरुवात झाली असून अजित पवारांनी तालुक्यातील सहकारी संस्थांचे पदाधिकारी आणि पक्षाचे पदाधिकारी यांच्या बैठका घेण्यास सुरुवात केली असून त्यामध्ये त्यांनी निवडणूक लढविण्याबाबत स्पष्टपणे सांगितले आहे.
राष्ट्रवादी काँग्रेसच्या दृष्टीने माळेगावची निवडणूक प्रतिष्ठेची आणि सभासदांच्या दृष्टीने महत्वाची आहे. माळेगाव कारखाना जिंकण्यासाठी सर्वांनी शर्थीचे प्रयत्न करा. प्रचारात आणि निवडणुकीच्या कामात हलगर्जीपणा खपवून घेतला जाणार नाही. असा इशारा अजितदादांनी पदाधिकाऱ्यांना दिला आहे. अजित पवारांच्या भाषणानंतर राष्ट्रवादी काँग्रेसचे कार्यकर्ते जोमाने कामाला लागले आहेत.
दरम्यान बारामतीत असणाऱ्या अजित पवारांना ज्येष्ठ नेते शरद पवारांच्या पक्षाचे तालुकाध्यक्ष ॲड. एस. एन. जगताप, गणपत देवकाते हे पदाधिकारी भेटल्याची माहिती समोर आली आहे. त्याबाबत पवारांच्या पक्षाचे कार्यकर्ते गौरव जाधव म्हणाले जगताप आणि देवकाते यांच्या भेटीबाबत मला सांगता येणार नाही. पण, शरद पवार आणि युगेंद्र पवार हे माळेगाव निवडणुकीबाबत रविवारी इच्छुकांची बैठक घेणार आहेत. त्यानंतरच निवडणुकीची पुढील दिशा ठरणार आहे. या भेटीनंतर बारामतीत उलटसुलट चर्चांना सुरुवात झाली आहे.
मंत्र्यांकडून धमकावले जात आहे
माळेगाव कारखान्याची निवडणूक निर्णायक टप्प्यावर येऊन पोचली आहे. सहकार बचाव पॅनेलला सभासदांकडून मोठा पाठिंबा मिळत आहे. मात्र बारामती व इंदापूरचे दोन मंत्री कारखान्याच्या निवडणुकीच्या प्रचारात पदाधिकारी, अधिकारी व कर्मचाऱ्यांना धमकावत आहेत. ही दादागिरी सभासद मोडून काढतील असा विश्वास चंद्रराव तावरे यांनी बोलून दाखवला. यावेळी रंजन तावरे उपस्थित होते.
