टीम लोकमन जालना |
जालन्यात दोन कारची समोरासमोर धडक होऊन झालेल्या भीषण अपघातात एका शिक्षकाचा जागीच मृत्यू झाला आहे तर एकजण गंभीर जखमी झाल्याची घटना समोर आली आहे. ही घटना रविवारी (दिनांक 22) सायंकाळी साडेचारच्या सुमारास जाफ्राबाद-जालना रोडवरील सावंगी-गोधनखेडा फाट्याजवळ घडली आहे. विनोद बाबुराव कळंबे (वय 44) असे या अपघातात मृत झालेल्या शिक्षकाचे नाव आहे.
मिळालेल्या माहितीनुसार, टेंभुर्णी येथील विनोद कळंबे हे (MH21 BQ.9595) क्रमांकाच्या कारने टेंभुर्णीकडून जाफ्राबादकडे येत होते. तर रामेश्वर नामदेव पवार (वय 45) हे (MH28 EW 4326) क्रमांकाच्या कारने जाफ्राबादकडून देऊळगाव राजाकडे जात होते. सावंगी-गोधनखेडा फाट्याजवळ दोन्ही वाहनांची समोरासमोर जोरदार धडक होऊन हा अपघात झाला आहे.
अपघातानंतर स्थानिक नागरिकांनी तात्काळ घटनास्थळी धाव घेत जखमींना वाहनातून बाहेर काढले व उपचारासाठी रुग्णालयात हलविले. गंभीर जखमी झालेल्या विनोद कळंबे यांना पुढील उपचारासाठी जालना येथील रुग्णालयात दाखल करण्यात आले होते. मात्र उपचारादरम्यान त्यांचा मृत्यू झाला. या घटनेमुळे टेंभुर्णी परिसरात हळहळ व्यक्त होत असून कळंबे कुटुंबावर शोककळा पसरली आहे. विनोद कळंबे हे जाफ्राबाद तालुक्यातील नळवीरा येथील जिल्हा परिषद शाळेत शिक्षक म्हणून कार्यरत होते. तसेच ते राष्ट्रवादी काँग्रेस (शरद पवार गट) तालुकाध्यक्ष रामधन कळंबे यांचे लहान भाऊ होते. दरम्यान या अपघाताची नोंद पोलिस ठाण्यात करण्यात आली असून या प्रकरणी पुढील तपास सुरू आहे.
