टीम लोकमन मंगळवेढा |
सोलापूर जिल्ह्याच्या शैक्षणिक विकासात मोलाचे योगदान देणाऱ्या शाळा व शिक्षकांचा छत्रपती परिवाराच्या वतीने दरवर्षी प्रमाणे यंदाही सन्मान करण्यात येणार असून या पुरस्कार योजनेत सहभागी व्हावे असे आवाहन छत्रपती परिवाराचे संस्थापक सुरेश पवार यांनी केले आहे.
मरवडे येथील छत्रपती परिवार व स्व.आप्पा खंडू भगरे सामाजिक ट्रस्टच्या वतीने 2001 पासून जिल्ह्यातील शाळा व शिक्षकांचा विविध शैक्षणिक पुरस्कार देऊन गौरविण्यात येते. सोलापूर जिल्ह्यातील प्राथमिक शाळांसाठी स्वच्छ व सुंदर शाळा पुरस्कार योजना राबविण्यात येत असून शाळांचे अंतरंग, बाह्यांग, वर्गसजावट, शैक्षणिक गुणवत्ता, सहशालेय उपक्रम इत्यादी बाबी विचारात घेऊन शाळांची निवड करण्यात येते. शिवाय उत्कृष्ट वृक्ष लागवड व संवर्धन करणाऱ्या शाळांचा ‘वृक्ष मित्र शाळा’ पुरस्कारासाठी निवड केली जाते.
त्याचबरोबर जिल्ह्यातील प्राथमिक व माध्यमिक शिक्षकांचा दरवर्षी कृतीनिष्ठ शिक्षक पुरस्कार देऊन सन्मान करण्यात येतो. शिक्षकांच्या शैक्षणिक, सामाजिक, साहित्य व क्रीडा विषयक कामाची दखल घेऊन हे पुरस्कार निश्चित करण्यात येतात. शैक्षणिक क्षेत्रातील चांगुलपण समाजापुढे आणण्याचे काम या पुरस्कार योजनेच्या रुपाने केले जाते.
या पुरस्कारांसाठी निवड करण्यात येणाऱ्या शाळा व शिक्षकांचा गौरव मानपत्र, सन्मानचिन्ह, फेटा, शाल व बुके देऊन मान्यवरांच्या हस्ते करण्यात येणार आहे. तरी या पुरस्कार योजनेत सहभागी होऊ इच्छिणाऱ्या शाळा व शिक्षकांनी आपले प्रस्ताव दिनांक 25 मार्च 2026 पर्यंत संस्थेकडे सादर करावेत असे आवाहन प्रा. बाळासाहेब भगरे, रावसाहेब सुर्यवंशी, नवनाथ जाधव, शशिकांत घाडगे, सिद्धेश्वर रोंगे, देविदास चौधरी, प्रवीण गुंड, अरुण सरडे, रावसाहेब जाधव यांनी केले आहे. अधिक माहितीसाठी 7057475610, 9764525281, 9421067107 या क्रमांकावर संपर्क साधावा असे आवाहन संयोजकांच्या वतीने करण्यात आले आहे.
