टीम लोकमन मंगळवेढा |
भारतातील पहिला एचएमपीव्ही रुग्ण कर्नाटक राज्यात आढळल्यानंतर देशातील इतर राज्यातही या व्हायरसचा संसर्ग झाल्याचे समोर येत आहे. कर्नाटकनंतर गुजरात आणि महाराष्ट्र राज्यात सुद्धा एचएमपीव्हीचे रुग्ण आढळले आहेत.
महाराष्ट्रात नागपूरनंतर आता मुंबईत रुग्ण सापडले आहेत. मुंबईत सहा महिन्यांच्या चिमुकलीला एचएमपीव्हीची लागण झाली आहे. तिला गेल्या आठवड्यात रुग्णालयात दाखल केले होते. तिच्यावर आता अतिदक्षता विभागात (आयसीयू) उपचार सुरू आहेत.
हिरानंदानी हॉस्पिटलच्या डॉक्टरनी सांगितले की, याबाबत स्थानिक प्रशासनाला माहिती देण्यात आली आहे. 1 जानेवारीलाच या प्रकरणाची माहिती समजली होती. बीएमसीच्या परेलमधील आरोग्य विभागाच्या कार्यालयाने मात्र अशी काही माहिती नसल्याचचे सांगितले आहे. संपूर्ण देशभरात 10 पेक्षा जास्त रुग्ण गेल्या काही दिवसात आढळले आहेत. नागपूरच्या एका खासगी रुग्णालयात दोन रुग्ण आढळल्याची माहिती सोमवारी दिली होती.
चीनमध्ये एचएमपीव्ही रुग्णवाढीच्या दरामुळे जगाची चिंता वाढली आहे. कोरोनानंतर आता एचएमपीव्हीचा धोका निर्माण झाल्याने जगभरात खळभळ उडाली आहे. पण हा व्हायरस गेल्या अनेक वर्षांपासून अस्तित्वात असल्याने घाबरण्याची आवश्यकता नसल्याचे आरोग्य विभागाच्या अधिकाऱ्यांनी म्हटले आहे. कोरोनासारखी स्थिती होण्याची शक्यता नसल्याचे म्हटले जात आहे.
आता नव्या रॅपिड चाचण्या उपलब्ध असून त्यामुळे काही तासाताच या व्हायरसची लागण झाली आहे की नाही हे ओळखता येते. यासाठी 7 हजार रुपयांचा खर्च असल्याचे एका डॉक्टरांनी सांगितले. एचएमपीव्हीच्या लक्षणापैकी एक असलेल्या तापाच्या प्रकरणांकडेही लक्ष दिले जात असल्याचे डॉक्टरांनी सांगितले आहे.
अधिकाऱ्यांनी सांगितले की, देशातील गाइडलाइन्समध्ये डॉक्टर आणि लॅबसाठी एचएमपीव्हीच्या प्रकरणांबद्दल आरोग्य अधिकाऱ्यांना कळविणे बंधनकारक केलेले नाही. जर डॉक्टर आणि लॅबकडून आम्हाला माहिती दिली गेली तर आम्हाला फ्लू सारख्या आजारांच्या वाढीवर विशिष्ट भागामध्ये योग्य पद्धतीने लक्ष देता येईल.
