टीम लोकमन मंगळवेढा |
राष्ट्रवादी काँग्रेस पक्षाचे राष्ट्रीय अध्यक्ष व राज्याचे उपमुख्यमंत्री अजित पवार आज अमरावती दौऱ्यावर आहेत. आमरावतीच्या काँग्रेस आमदार सुलभा खोडके यांनी अजित पवारांच्या स्वागताचे बॅनर लावले आहेत. अजित पवारांच्या बॅनरमुळे शहरात एकच चर्चा रंगली आहे. सुलभा खोडके अजितदादांच्या राष्ट्रवादी काँग्रेसमध्ये प्रवेश करणार का? याबाबत अमरावतीच्या राजकारणात मोठ्या प्रमाणात चर्चा रंगली आहे.
काँग्रेसच्या विद्यमान आमदार सुलभा खोडके या अजित पवार यांच्या राष्ट्रवादी काँग्रेसमध्ये प्रवेश करणार असल्याचा अंदाज याआधीच व्यक्त करण्यात येत होता. आता शहरातील बॅनरमुळे काँग्रेसच्या आमदार सुलभा खोडके या अजितदादांच्या यांच्या राष्ट्रवादी काँग्रेसमध्ये प्रवेश करणार असल्याची शक्यता अधिकच वाढली असून त्याला दुजोरा मिळत आहे.
आमदार सुलभा खोडके यांच्या अमरावती विधानसभा मतदारसंघातील अनेक विकासकामांच्या भूमिपूजनासाठी आज राज्याचे उपमुख्यमंत्री व अर्थमंत्री अजित पवार उपस्थित राहणार आहेत. त्या पार्श्वभूमीवर अजित पवारांच्या स्वागताचे बॅनर संपूर्ण शहरात झळकले आहेत.
सुलभा खोडके अजितदादांच्या राष्ट्रवादीत जाणार?
अमरावती येथील काँग्रेसच्या आमदार सुलभा खोडके यांच्या विधानसभा मतदारसंघात उपमुख्यमंत्री अजित पवारांच्या हस्ते कोट्यवधी रुपयांच्या विकासकामांचे भूमिपूजन करण्यात येणार आहे. सुलभा खोडके या काँग्रेसच्या विद्यमान आमदार असल्या तरीसुद्धा राज्यातील काँग्रेसचा कोणताही मोठा नेता या कार्यक्रमासाठी येणार नसल्याचे समजते. त्यामुळे सुलभा खोडके या राष्ट्रवादी काँग्रेसमध्ये जाणार असल्याची चर्चा अमरावतीमध्ये जोर धरत आहे.
सुलभा खोडके यांचे पती संजय खोडके हे उपमुख्यमंत्री अजित पवार यांचे सचिव आहेत. त्यामुळे सुलभा खोडके यांचा अजित पवार गटात प्रवेश होणार असल्याचे निश्चित मानले जात आहे. सुलभा खोडके आगामी विधानसभा निवडणुक अमरावती मतदारसंघातून लढवणार आहेत.
कसा आहे आमदार सुलभा खोडके यांचा राजकीय प्रवास
सुलभा खोडके यापूर्वी एकसंघ राष्ट्रवादी काँग्रेसमधून आमदार म्हणून निवडून आल्या होत्या. त्या आधीपासूनच अजित पवारांच्या संपर्कात आहेत. मागील निवडणुकीआघी राष्ट्रवादी काँग्रेसला रामराम करत त्या काँग्रेसच्या तिकिटावर निवडून आल्या. 2004 मध्ये त्यांनी राष्ट्रवादी काँग्रेसमधून पहिल्यांदा आमदारकी मिळवली होती. 2009 मध्ये आमदार रवी राणा यांच्याकडून पराभव स्विकारावा लागला होता. 2014 च्या विधानसभा निवडणुकीतही त्यांना पराभवाचा सामना करावा लागला होता. 2019 मध्ये त्यांनी काँग्रेसकडून निवडणुकीच्या रिंगणात उतरत विजय मिळवला आहे.
